آئندہ 24 گھنٹوں کے دوران تیز بارش سے طغیانی اور لینڈسلائیڈنگ کا خطرہ

آئندہ 24 گھنٹوں کے دوران اسلام آباد، گلگت بلتستان، مری، گلیات، خیبرپختونخوا اور بالائی پنجاب میں تیز بارش سے طغیانی، لینڈ سلائیڈنگ کا خدشہ ہے، کمزور انفراسٹریکچر کو نقصان پہنچنے کا بھی اندیشہ ہے۔

محکمہ موسمیات کے مطابق آئندہ 24 گھنٹوں کے دوران خیبر پختونخوا، بالائی پنجاب، اسلام آباد، گلگت بلتستان اور کشمیر میں آندھی، گرج چمک کے ساتھ مزید بارش اور چند مقامات پر ژالہ باری یا موسلا دھار بارش کا امکان ہے۔ ملک کے دیگر علاقوں میں موسم خشک، تیز ہوائیں اور جھکڑ چلنے کا امکان ہے۔

منگل کے روز ملک کے بیشتر علاقوں میں موسم خشک رہنے کا امکان ہے جبکہ بالائی خیبر پختونخوا ، بالائی پنجاب ،گلگت بلتستان اورکشمیر میں چند مقامات پر تیز ہوائیں چلنے اور گرج چمک کے ساتھ مزید بارش اور بعض مقا مات پر ژالہ باری کا بھی امکان ہے۔

محکمہ موسمیات نے انتباہ جاری کیا ہے کہ آج تیز اور موسلادھار بارش کے باعث دیر، سوات، چترال، مانسہرہ، کوہستان اور کشمیر کے مقامی ندی نالوں میں طغیانی کا خطرہ ہے۔

تیز بارش کے باعث بالائی خیبر پختونخوا، مری، گلیات،کشمیر اور گلگت بلتستان میں لینڈسلائیڈنگ کا بھی خدشہ ہے، آندھی، گرج چمک اور تیز بارش کے باعث انسانی جانوں، کھڑی فصلوں، کمزور انفرا سٹرکچر کو نقصان پہنچنے کا اندیشہ ہے