انڈین کرکٹ بورڈ نے آئی سی سی مینز ٹی20 ورلڈ کپ لیے 15 رکنی ٹیم کا اعلان کردیا۔
مزید پڑھیں
بھارتی کرکٹ بورڈ نے ٹی20 ورلڈ کپ 2024 کے لیے ٹیم کا اعلان اپنی ویب سائٹ پر کیا، جس میں انڈین ٹیم کے میچز کا شیڈول بھی دیا گیا ہے۔
اس شیڈول کے مطابق، ٹی20 ورلڈ کپ کے گروپ ’اے‘ میں شامل ٹیم انڈیا کل 4 میچز کھیلے گی۔ بھارتی ٹیم گروپ میچز میں آئرلینڈ، پاکستان، امریکا اور کینیڈا کے خلاف کھیلے گی۔ پاکستان اور بھارت کا ٹاکرا 9 جون (اتوار) کو نیویارک میں ہوگا۔
بھارتی اسکواڈ میں شامل کھلاڑیوں کے نام
انڈین کرکٹ بورڈ کی سینیئر سلیکشن کمیٹی کی جانب سے جاری کی گئی فہرست کے مطابق، ٹی20 ورلڈ کپ کے لیے بھارتی ٹیم کے کپتان روہت شرما اور نائب کپتان ہارڈک پانڈیا ہوں گے۔
دیگر کھلاڑیوں میں یشاسوی جیسوال، ویرات کوہلی، سوریاکمار یادیو، رشبھ پنٹ (وکٹ کیپر)، سنجو سیمون (وکٹ کیپر)، شوم دوبے، رویندرا جدیجہ، اکژر پٹیل، کلدیپ یادیو، یزویندرا چاہل، ارشدیپ سنگھ، جسپریت بمراہ اور محمد سراج شامل ہیں۔
ٹی20 ورلڈ کپ کے لیے انگلینڈ، جنوبی افریقہ اور نیوزی لینڈ کرکٹ بورڈز بھی اپنی ٹیموں کا اعلان کرچکے ہیں۔
واضح رہے کہ آئی سی سی مینز ٹی 20 ورلڈ کپ 2024 امریکا اور ویسٹ انڈیز کی مشترکہ میزبانی میں ہو رہا ہے اور اب آئی سی سی نے میچوں کے لیے امریکا میں نیویارک، فلوریڈا اور ٹیکساس سمیت 3 وینیوز کا اعلان کردیا ہے۔
