بائیکاٹ کا اثر، ملائیشیا میں کے ایف سی کے 100سے زائد آؤٹ لیٹس بند

فرائیڈ چکن کی معروف فوڈ چین ‘کے ایف سی’ ملائیشیا میں اپنے آؤٹ لیٹس بند کرنے پر مجبور ہوگئی۔کے ایف سی نےملائیشیا میں اپنے آؤٹ لیٹس کی بندش کی وجہ مشکل معاشی حالات کو قرار دیا۔

فرائیڈ چکن کی معروف فوڈ چین ‘کے ایف سی’ ملائیشیا میں اپنے آؤٹ لیٹس بند کرنے پر مجبور ہوگئی۔کے ایف سی نےملائیشیا میں اپنے آؤٹ لیٹس کی بندش کی وجہ مشکل معاشی حالات کو قرار دیا۔تاہم مقامی میڈیا کی رپورٹ کے مطابق بندش کی وجہ فاسٹ فوڈ چین کے اسرائیل سے روابط کی وجہ سے کیا جانے والا بائیکاٹ ہے۔

خیال رہے کہ غزہ میں اسرائیل کی جانب سے جاری نسل کشی کے سبب مسلمانوں کی ایک بڑی تعداد ان مغربی برانڈز کا بائیکاٹ کررہی ہے جن کے اسرائیل سے روابط ہیں یا وہ اس کی حمایت کرتے ہیں۔

کیو ایس آر برانڈز (ایم) ہولڈنگز بی ایچ ڈی نامی کمپنی جو ملائیشیا میں کے ایف سی اور پیزا ہٹ فرنچائزز چلاتی ہے، نے کہا کہ اس نے عارضی طور پر کے ایف سی آؤٹ لیٹس کو مشکل معاشی حالات کی وجہ سے بند کر دیا ہے۔

بیان میں کمپنی نے یہ نہیں بتایا گیا کہ کتنے اسٹورز متاثر ہوئے ہیں، لیکن مقامی میڈیا نے اطلاع دی ہے کہ 100 سے زیادہ آؤٹ لیٹس عارضی طور پر بند کردیے گئے ہیں۔

کیو ایس آر برانڈز نے کہا کہ متاثرہ اسٹورز کے ملازمین کو ان علاقوں میں آؤٹ لیٹس پر منتقل ہونے کا موقع فراہم کیا گیا جہاں سیلز زیادہ ہے۔