کارخانے کا مالک ہی ڈکیتی کا سرغنہ نکلا، لوٹا جانے والا سونا برآمد

کراچی پولیس کی اہم کارروائی صدر صرافہ بازار میں سونے کے کارخانے میں ڈکیتی کرنے والے ملزمان گرفتار کر لیے گئے۔ کارخانے کا مالک ہی ڈکیتی کا سرغنہ نکلا، لوٹا جانے والا سونا بھی برآمد کر لیا گیا ہے۔

پولیس کے مطابق27 اپریل کو دن 12 بجے پولیس کو سونے کے کارخانے میں 140 گرام سونے کی ڈکیتی کی اطلاع دی گئی تھی۔ پولیس نے ٹیکنیکل بنیادوں پر تفتیش شروع کی اور مشکوک افراد کا کال ریکارڈ حاصل کرکے چھان بین کی گئی۔ سی سی ٹی وی فوٹیج و دیگر شواہد کو دیکھتے ہوئے وارادت مشکوک معلوم ہوئی۔

پریڈی پولیس نے معاملہ مشکوک جانتے ہوئے کارخانے کے مالک کاشف اور ان کے رشتے داروں کو کیس میں شامل تفتیش کیا۔ ملزم کاشف نے دوران تفتیش انکشاف کیا کہ اس نے اپنے بھائی عادل کے ساتھ اپنے ہی کارخانے میں ڈکیتی کا منصوبہ بنایا تھا۔ ملزم نے مالی پریشانیوں اور قرضے سے جان چھڑانے کے لیے اپنے بھتیجے اور رشتے دار سے ڈکیتی کروائی تھی۔

گرفتار ملزم نے ڈکیتی سے حاصل ہونے والے سونے سے اپنا قرض اتارنے کا منصوبہ بنایا تھا۔ چاروں ملزمان کے خلاف مقدمہ پریڈی تھانے میں درج کرلیا گیا ہے۔