کراچی پولیس نے شہریوں کو نقلی پستول دِکھا کر لوٹنے کی کوشش کرنے والے 3 ملزمان کو گرفتار کرلیا ہے۔
ڈسٹرکٹ سینٹرل پولیس کے مطابق بلال کالونی پولیس نے نارتھ کراچی میں دوران گشت ڈی کا موڑ پر 3 مشتبہ موٹر سائیکل سوار کم عمر لڑکوں کی تلاشی لی، ملزمان کے قبضے سے ایک عدد نقلی پستول برامد ہوئی ہے۔
مزید پڑھیں
ملزمان کی شناخت حسن ولد اکبر علی راشد ولد عبدالرشید اور کاشان ولد قادر بخش کے نام سے ہوئی، ابتدائی تفتیش میں ملزمان نے بتایا کہ وہ واردات کی نیت سے کھڑے تھے، پولیس نے ملزمان کو گرفتار کر کے تھانے منتقل کردیا ہے اور ان کے خلاف مقدمہ درج کرکے مزید تفتیش شروع کردی ہے۔
دوران گشت ایک اور کارروائی میں بلال کالونی پولیس نے بمقام اپنا لان سیکٹر فائیو ای نارتھ کراچی سے موٹر سائیکل لفٹنگ میں ملوث ملزم ارسلان ولد اقبال کو گرفتار کیا ہے، ملزم کے قبضے سے چوری شدہ موٹر سائیکل برآمد ہوئی ہے۔
پولیس نے ملزم کے خلاف مقدمہ درج کرکے مزید تفتیش شروع کردی ہے۔
