نواز شریف کی زیرصدارت ن لیگ کا اہم اجلاس، پارٹی کی تنظیم نو سمیت اہم امور پر تبادلہ خیال

پاکستان مسلم لیگ ن کے قائد نواز شریف کی زیرصدارت پارٹی کے سینیئر رہنماؤں کا مشترکہ اجلاس ہوا ہے جس میں پارٹی کی تنظیم نو سمیت دیگر اہم امور پر تبادلہ خیال کیا گیا۔

ذرائع کے مطابق مسلم لیگ ن کا اجلاس پارٹی کے سیکریٹریٹ ماڈل ٹاؤن میں ہوا جس میں وزیراعلیٰ پنجاب مریم نواز نے بھی شرکت کی۔

اجلاس میں رانا ثنااللہ، اعظم نذیر تارڑ، احسن اقبال، سعد رفیق، ایاز صادق، بلال اظہر کیانی، انوشے رحمان نے شرکت کی۔

پارٹی ذرائع کے مطابق اجلاس میں وزیراعلیٰ پنجاب مریم نواز نے گندم خریداری بحران پر اپنی صوبائی حکومت کی ترجیحات اور پالیسی سے آگاہ کیا۔

ذرائع نے بتایا کہ اجلاس میں وفاقی وزیر قانون اعظم نذیر تارڑ نے مخصوص نشستوں کے حوالے سے سپریم کورٹ کے فیصلے کے بعد کی صورتحال پر بریفنگ دی۔

ذرائع کے مطابق اجلاس میں 11 مئی کو ہونے والے مسلم لیگ ن کے جنرل کونسل کے اجلاس کے حوالے سے بھی مشاورت کی گئی۔

ذرائع نے بتایا کہ اجلاس میں احسن اقبال نے 11 مئی کے جنرل کونسل اجلاس کے اغراض و مقاصد اور حکمت عملی پر بریفنگ دی۔