نواز شریف کو مسلم لیگ ن کا صدر بنانے کی قرارداد متفقہ منظور

مسلم لیگ ن پنجاب کے تنظیمی اجلاس میں قائد مسلم لیگ ن میاں نواز شریف کو پارٹی صدر بنانے کی قرار داد متفقہ منظور کرلی گئی۔

قرارداد میں مسلم لیگ ن کے قائد نواز شریف کی قیادت پر مکمل اعتماد کا اظہار کیا گیا ہے۔

قرار داد میں کہا گیا ہے کہ نواز شریف کو 2017 میں ایک سازش کے تحت نااہل کیا گیا اور پھر جبری طور پر پارٹی صدارت سے ہٹایا گیا۔

قرارداد کے متن میں درج ہے کہ آج جبکہ سازشی آرڈرز اور جعلی سزائیں اپنے انجام کو پہنچ چکی ہیں اور نواز شریف سرخرو ہوگئے ہیں تو پارٹی ان سے استدعا کرتی وہ دوبارہ قیادت سنبھالیں۔

قرارداد میں کہا گیا ہے کہ نواز شریف قیادت سنبھالیں تاکہ پارٹی ان کی ولولہ انگیز قیادت میں عوامی مقبولیت کی نئی جہتیں طے کرسکے۔

قرارداد کے مطابق ضمنی انتخابات میں پارٹی کی بھرپور کامیابی پر پنجاب کی تنظیم بالخصوص پارٹی قیادت کو مبارکباد پیش کرتے ہیں۔

فلسطین کے عوام پر اسرائیلی مظالم کی مذمت

قرارداد میں کہا گیا ہے کہ پاکستان مسلم لیگ ن کی قیادت کی جانب سے فلسطین پر صہیونی مظالم کی پرزور مذمت کرنے پر ان کی بھرپور حمایت کرتے ہیں۔

قرارداد کے مطابق پارٹی قیادت فلسطین کے معصوم بچوں اور عورتوں پر ہونے والے مظالم ختم کروانے اور جنگ بندی کے لیے مزید کاوشیں کرے۔

واضح رہے کہ پاکستان مسلم لیگ ن نواز شریف کو دوبارہ پارٹی صدر بنانے کا فیصلہ کرچکی ہے۔ سینیئر لیگی رہنما رانا ثنااللہ نے آج پریس کانفرنس کرتے ہوئے کہاکہ نواز شریف کو دوبارہ پارٹی قیادت سنبھالنے کی درخواست کردی ہے۔