اسلام آباد ہائی کورٹ نے اقدام قتل کے مقدمے میں عمران خان کی حاضری سے استثنیٰ سے درخواست منظور کرتے ہوئے ضمانت میں 6 اپریل تک توسیع کردی ہے۔
اسلام آباد ہائی کورٹ کے چیف جسٹس عامر فاروق نے محسن شاہ نواز رانجھا کی مدعیت میں درج مقدمے میں پی ٹی آئی چیئرمین کی درخواست ضمانت پر سماعت کی۔
عمران خان کے وکیل فیصل چوہدری نے عدالت کو بتایا کہ عمران خان یہاں پیش ہونا چاہتے تھے مگر آج ان کو لاہور ہائی کورٹ میں پیش ہونا تھا۔
اس موقع پر سرکاری وکیل زوہیب گوندل نے کہا کہ ہم نے 2 نوٹسز جاری کیے مگر عمران خان ابھی تک شامل تفتیش نہیں ہوئے۔
عمران خان کے وکیل فیصل چوہدری نے کہا کہ اگر تفتیشی آفیسر سمجھتے ہیں کہ فزیکل بیان ریکارڈ کرانا ضروری ہے تو میرے ساتھ لاہور چلیں، بیان ریکارڈ کرا دیتا ہوں یا جس روز میرے موکل نے یہاں پیش ہونا ہے اسی روز بیان ریکارڈ کر لیاجائے۔
چیف جسٹس ہائی کورٹ عامر فاروق نے ریمارکس دیے کہ تفتیشی آفیسر اور عمران خان کے وکیل دونوں مل کر فیصلہ کریں کہ کیا کرنا ہےا ور اس کے ساتھ ہی سماعت ملتوی کردی۔
