عمران خان اقتدار میں آگئے تو القادر ٹرسٹ کی رجسٹریشن پلیٹ میں رکھ کر کردی جائے گی، جسٹس گل حسن اورنگزیب

اسلام آباد ہائیکورٹ کے جسٹس میاں گل حسن اورنگزیب نے القادر ٹرسٹ کی رجسٹریشن سے متعلق کیس کی سماعت کے دوران ریمارکس دیے ہیں کہ اگر بانی پی ٹی آئی اقتدار میں آگئے تو رجسٹریشن پلیٹ میں رکھ کر کردی جائے گی۔

القادر یونیورسٹی ٹرسٹ کی نئے ٹرسٹ ایکٹ کے تحت رجسٹریشن کی درخواست پر اسلام آباد ہائیکورٹ کے جسٹس میاں گل حسن اورنگزیب نے سماعت کی۔

عمران خان کے وکیل نے عدالت سے استدعا کی کہ القادر ٹرسٹ کو نئے اسلام آباد ٹرسٹ ایکٹ کے تحت رجسٹر کرنے کے لیے چیف کمشنر کو حکم دے۔

چیف کمشنر اسلام آباد کی طرف سے رپورٹ جمع نہ ہونے پر عدالت نے برہمی کا اظہار کرتے ہوئے ریمارکس دیے کہ سرکاری عہدیدار کیوں خوف محسوس کر رہے ہیں، ان کو صرف اللہ کا خوف ہونا چاہیے۔

جسٹس گل حسن اورنگزیب نے ریمارکس دیے کہ ذہن میں رکھیں کہ موجود حکومت صرف 5 سال کے لیے اقتدار میں رہے گی، بانی پی ٹی آئی کل اقتدار میں آگئے تو پلیٹ میں رکھ کر اس ٹرسٹ کی رجسٹریشن کر دی جائے گی۔

عدالت نے چیف کمشنر اسلام آباد سے آئندہ سماعت پر دوبارہ رپورٹ طلب کرتے ہوئے کیس کی سماعت ملتوی کردی۔