ڈیرہ اسماعیل خان میں پولیس چیک پوسٹ پر فائرنگ کے بعد فرار ہونے والے دہشت گردوں کی سیکیورٹی فورسز کے ساتھ جھڑپ ہوئی ہے جس میں 3 دہشت گرد ہلاک کر دئیے گئے جبکہ اس دوران میں 3 جوانوں نے بھی جام شہادت نوش کیا ہے۔
آئی ایس پی آر کے مطابق ڈیرہ اسماعیل خان کے علاقے کھوٹی میں دہشت گردوں نے پولیس چیک پوسٹ پر فائرنگ کی اور فرار ہوگئے جس کے بعد سیکیورٹی فورسز نےعلاقے کو گھیرے میں لے کر سرچ آپریشن کیا ۔ نواحی علاقے ’سگو ‘میں دہشت گردوں کے ساتھ جھڑپ ہوئی جہاں 3 دہشر گردوں کو ہلاک کر دیا گیا اور ان کے قبضہ سے اسلحہ وگولہ بارود بھی برآمد ہوا ہے۔
آئی ایس پی آر کے مطابق دہشت گردوں کے ساتھ جھڑپ میں پاک فوج کے 3 جوان حوالدار محمد اظہر اقبال، نائیک محمد اسد اور سپاہی محمد عیسیٰ نے بھی جام شہادت نوش کیا ہے۔
آئی ایس پی آرنے بتایا کہ پاک فوج دہشت گردی کی لعنت کو ختم کرنے کے لیے پرعزم ہے اور ایسی کارروائیاں ہمارے عزم کو مزید مضبوط کرتی ہیں۔
