پاکستان تحریک انصاف سے تعلق رکھنے والے سابق رہنماؤں اور کارکنان نے اے ایس پی شہربانو نقوی کی اس ویڈیو پر تنقید کے نشتر برسادیے۔
اسلام آباد پولیس کے فیس بک پیج پر شیئر کردہ اس ویڈیو میں اے ایس پی شہربانو نقوی کیپٹل پولیس کی جانب سے کیے جانے والے نئے اقدامات کے بارے میں بتاتی نظر آئیں۔
ویڈیو میں اے ایس پی شہر بانو نقوی نے بتایا کہ اسلام آباد پولیس کی جانب سے جانوروں کے لیے ریسکیو سینٹر، بچوں کی دیکھ بھال کے سینٹر، خواجہ سراؤں کی بہتری کے لیے محفوظ ماحول، ہاسٹل کے قیام اور ہنر مندی کی تربیت دینے کے اقدامات کیے جارہے ہیں۔
ویڈیو میں انہوں نے عوام سے پولیس کا ساتھ دینے کی بھی اپیل کی۔ تاہم پاکستان تحریک انصاف سے تعلق رکھنے والے سابق رہنماؤں اور کارکنان نے اے ایس پی شہربانو نقوی کی اس ویڈیو پر تنقید کے نشتر برسادیے۔
سابق وفاقی وزیر شیریں مزاری نے کہا کہ ‘یہ دیکھتے ہوئے کہ ان کا زیادہ تر مکالمہ انگریزی میں ہے واضح طور پر ان کے سامعین کا ہدف عوام نہیں بلکہ ایک اشرافیہ طبقہ ہے۔ ساتھ ہی سابق وزیر انسانی حقوق نے مشورہ دیا کہ ‘ٹرانس جینڈر قانون موجود ہے لہذا اس پر عمل درآمد کیا جائے۔
شیریں مزاری نے مزید کہا کہ پولیس کا پہلا فرض قانون کو نافذ کرنا اور قانون کے اندر رہ کر کام کرنا ہے ، بغیر وارنٹ کے گھروں میں گھسنا، لوگوں کو باہر گھسیٹنا، تشدد کا استعمال کرنا اور اس عمل میں سامان چوری کرنا، پولیس شہریوں کے لیے تحفظ کا ذریعہ ہے نہ کہ خطرے اور عدم تحفظ کا ذریعہ۔
ان کے علاوہ فواد چوہدری نے اس ویڈیو کو ری پوسٹ کر کے کہا کہ ‘پاکستان میں پولیس ایک مذاق بن چکی ہے، خواتین افسروں کو ماڈل کے طور پر استعمال کرنا پولیس سروس کے لیے مزید پستی ہے’۔
انہوں نے کہا کہ پولیس کے لیے ظلم، بداخلاقی اور بدعنوانی ایک نیا معمول بن گیا ہے۔
ان کے علاوہ شہباز گل بھی تبصرہ کرنے سے باز نہ رہے۔ کہتے ہیں اب پولیس نے باقاعدہ ڈرامے بنانا شروع کردیے ہیں، ان لوگوں کو سمجھ نہیں آتی کہ لوگ ان کو کتنا ناپسند کرتے ہیں، ان کی بے وقوفی پر حیرت ہوتی ہے۔
اچھرہ واقعے کے بعد جب اے ایس پی شہر بانو نقوی مشہور ہوئیں تو سوشل میڈیا پر ان کی وہ تصاویر بھی وائرل ہوئی جس میں وہ پی ٹی آئی کی خواتین کارکنان کو گرفتار کررہی تھیں، اس کے بعد سے تحریک انصاف نے اپنی توپوں کا رخ ان کی جانب کر رکھا ہے۔
