ہنی سنگھ نے بھارت میں موسیقی کی دنیا میں کافی عرصہ راج کیا اور ایک وقت ایسا بھی آیا کہ ہر فلم میں ہنی سنگھ کے ریپ والا ایک نہ ایک گانا لازمی شامل کیا جاتا تھا لیکن پھر آہستہ آہستہ ہنی سنگھ منظرِ عام سے غائب ہوگئے اور ان کی جگہ بادشاہ نے لے لی۔
دونوں فنکاروں کے درمیان طویل عرصے سے تعلقات اچھے نہیں تھے اور گزشتہ سال بادشاہ نے ایک انٹرویو میں اس لڑائی سے متعلق کھل کر بات بھی کی۔ اگرچہ شائقینِ موسیقی اس بات کو قبول کر بیٹھے تھے کہ اب کبھی بھی بادشاہ اور ہنی سنگھ میں دوستی ممکن نہیں ہو سکتی۔ وہیں بادشاہ نے 24 مئی کو دہرادون میں منعقدہ اپنے ایک کنسرٹ کو بیچ میں روک کر ایک اعلان کر کے سب کو حیران کردیا۔
بادشاہ نے ایک کنسرٹ کے دوران ہنی سنگھ کے ساتھ طویل عرصے سے چلنے والے جھگڑے کو ختم کرکے دوستی کا ہاتھ بڑھانے کا اعلان کیا۔ گلوکار نے کہا کہ میں نے اپنی زندگی میں غلط فہمی کے سبب ایک شخص کے لیے دل میں کدورت رکھی اور اب میں چاہتا ہوں کہ سب کچھ پیچھے چھوڑ کر آگے بڑھ جاؤں اور وہ ایک شخص ہنی سنگھ ہے۔
انہوں نے کہاکہ میں خوش نہیں تھا لیکن اب احساس ہوا ہے کہ جب ہم دونوں ساتھ تھے تو ہمیں جوڑنے والے بہت کم تھے اور توڑنے والے زیادہ تھے لیکن آج اعلان کررہا ہوں کہ اس لڑائی کو ختم کررہا ہوں اور ہنی سنگھ کے لیے میری نیک تمنائیں ہیں۔
View this post on Instagram
سوشل میڈیا پر ہر سو بادشاہ کے اس بڑے اقدام کے چرچے ہورہے ہیں لیکن دوسری جانب ہنی سنگھ اس معاملے پر خاموشی اختیار کیے بیٹھے ہیں تاہم مداح سوشل میڈیا پر ہنی سنگھ کے ردِ عمل کا انتظار کرتے دکھائی دے رہے ہیں۔
