محمد شیراز کو دیکھ کر وی لاگنگ شروع کرنے والا گلگت کا آحل کون ہے؟

گلگت بلتستان سے تعلق رکھنے والے ننھے وی لاگر شیراز کے وی لاگ سے متاثر ہوکر وی لاگنگ شروع کرنے والے آحل کا تعلق گلگت بلتستان کے دور افتادہ علاقے یاسین سے ہے۔

آحل نے بھی شیراز کی طرح یوٹیوب چینل ’آحل ویلیج وی لاگ‘ کے نام سے بنایا جس کے 6 ہزار سبسکرائبر ہیں۔

آحل نے وی نیوز سے گفتگو کرتے ہوئے کہاکہ میں اپنے وی لاگ میں گلگت بلتستان کے خوبصورت مقامات دکھاتا ہوں، گلگت بلتستان کا ہر علاقہ خوبصورت ہے، شروع میں مزاحیہ ویڈیوز بناتا تھا مگر شیراز کی دیکھا دیکھی وی لاگنگ شروع کی ہے اور آگے بھی وی لاگ بناؤں گا۔

آحل نے پاکستان کے مشہور وی لاگر عمران ریاض اور ڈکی بھائی کو گلگت بلتستان آنے کی دعوت دی اور ان کے ساتھ وی لاگ بنانے کی بھی خواہش ظاہر کی ہے۔

آحل نے تمام اپنے چاہنے والوں کا شکریہ ادا کیا اور کہاکہ بہت جلد سلور بٹن حاصل کرکے شیراز کی طرح بڑا وی لاگر بنوں گا۔

آحل کے چچا امان علی شاہ نے بتایا کہ شیراز کو والد نے وی لاگنگ سے روکا ہے کیونکہ اس کی تعلیم متاثر ہورہی تھی مگر آحل تعلیم کے ساتھ ساتھ وی لاگنگ بھی کرتا ہے اور یہ چھوڑنے کا کوئی ارادہ نہیں کیونکہ اس سے اس کی تعلیم متاثر نہیں ہورہی۔

انہوں نے کہاکہ آحل نے جب سے وی لاگنگ شروع کی ہے اس میں خوداعتمادی بڑھ گئی ہے۔