سرکاری حج اسکیم کے لیے پری حج فلائٹ آپریشن اختتام پذیر ہوگیا

سرکاری حج اسکیم کے لیے پری حج فلائٹ آپریشن کامیابی کے ساتھ آج اختتام پذیر ہو گیا ہے۔ اسلام آباد سے آنے والی سعودی ایئر کی پرواز نمبر 3727کے ذریعے 380 عازمین کرام جدہ ایئر پورٹ لینڈ کر گئے۔ نجی حج اسکیم کے ذریعے 70 ہزار عازمینِ حج سعودی عرب پہنچ گئے۔

ترجمان مذہبی امور کے مطابق وزیر اگلے 2 روز میں مزید 20 ہزار پرائیویٹ عازمینِ حج سعودی عرب پہنچیں گے۔ سعودی مکاتب کی جانب سے منیٰ اور عرفات میں عازمینِ حج کے 5 روزہ قیام کی تیاریاں مکمل کر لی گئی ہیں۔ عازمینِ حج کی وادیِ منیٰ کے لیے روانگی کا آغاز 13 اور 14 جون کی درمیانی شب کو ہوگا۔

ترجمان کے مطابق پاکستان حج مشن نے وادیِ منیٰ میں عازمینِ حج کی سہولت کے لیے کیمپ آفس قائم کردیا ہے۔ کیمپ آفس میں شعبہ معلومات و رہنمائی، شکایات، امراض و اموات قائم کیے جائیں گے۔

مذہبی امور چوہدری سالک حسین حج انتظامات کا جائزہ لینے سعودی عرب پہنچ گئے ہیں۔ چوہدری سالک حسین آج مکہ مکرمہ میں منعقدہ حج سمپوزیم میں پاکستان کی نمائندگی کریں گے۔ وزیر مذہبی امور اور وفاقی سیکریٹری ذوالفقار حیدر حج آپریشن کی براہ راست نگرانی کریں گے۔

وفاقی وزیر چوہدری سالک حسین نے حج سے قبل فلائٹ آپریشنز کی کامیابی کو سراہا

وفاقی وزیر برائے مذہبی امور و بین المذاہب ہم آہنگی چوہدری سالک حسین نے کہا کہ پاکستان سے سعودی عرب کے لیے آخری پرواز کی روانگی کے ساتھ ہی حج سے قبل فلائٹ آپریشن اختتام پذیر ہو گیا ہے۔

اپنے پیغام میں وفاقی وزیر نے حج سے قبل فلائٹ آپریشنز کی کامیابی سے تکمیل پر اطمینان کا اظہار کرتے ہوئے کہا کہ یہ وزارت مذہبی امور اور بین المذاہب ہم آہنگی اور دیگر فریقین کی محتاط منصوبہ بندی اور ہم آہنگی کا بین ثبوت ہے۔

وفاقی وزیر نے کہا کہ ہموار آپریشن وزارت کے عملے کی محنت اور انتھک کاوشوں کا نتیجہ ہے جو انہوں نے حاجیوں کے آرام اور حفاظت کو یقینی بنانے کے لیے کی۔