وزارت اطلاعات سعودی عرب نے حج 1445ھ کے موسم کے لیے ورچوئل میڈیا سینٹر کا آغاز کیا ہے۔ اس سینٹر کا مقصد حج کے دوران میڈیا کے درمیان تعاون کو فروغ دینا، مواد کی تیاری، دستیابی اور نشریات کو ممکن بنانا اور میڈیا کے نمائندوں کے لیے حج کی کوریج میں آسانی پیدا کرنا ہے۔
ورچوئل میڈیا سینٹر ایک الیکٹرانک پلیٹ فارم کے طور پر کام کرتا ہے، جہاں سے سرکاری اداروں اور میڈیا اداروں کو ورچوئل میڈیا سروسز فراہم کی جاتی ہیں جو حج کی کوریج میں شریک ہیں۔
مزید پڑھیں
اس پلیٹ فارم کے ذریعے اعلیٰ معیار کی خبریں، تصاویر اور ویڈیوز اپ لوڈ کی جاتی ہیں، جس سے مستفید ہونے والے تقریبا 900 میڈیا نمائندگان ہیں جو مختلف بین الاقوامی اور مقامی نیوز ایجنسیوں، اخبارات اور چینلز کی نمائندگی کرتے ہیں۔
یہ سینٹر صحافیوں کو حج کے موسم کے دوران ہونے والی پریس کانفرنسوں میں ورچوئل شرکت کی سہولت بھی فراہم کرتا ہے، جو کئی زبانوں میں براہِ راست نشر کی جاتی ہیں۔
مزید برآں کوئی بھی رجسٹرڈ صحافی اس سینٹر سے کسی بھی میڈیا سروس کے حصول کی درخواست کرسکتا ہے، جیسے کہ کسی سرکاری عہدیدار کا انٹرویو، کسی موضوع پر معلومات کی طلب یا حج کے حوالے سے اعداد وشمار اور معلومات کی فراہمی شامل ہیں۔
ورچوئل میڈیا سینٹر کا قیام ان کوششوں کا حصہ ہے جو سعودی حکومت حج وعمرہ زائرین کی خدمت کو بہتر بنانے کے لیے کررہی ہے، اور جدید تکنیکی وسائل کا استعمال کرتے ہوئے حج کو آسان اور سہل بنانے کے لیے کام کررہی ہے۔
