پاکستان فٹ بال ٹیم کی تاجکستان روانگی ایک بار پھر تاخیر کا شکار ہوگئی ہے۔
فیفا ورلڈ کپ کوالیفائر راؤنڈ ٹو میں پاکستان فٹ بال ٹیم کا میچ کل تاجکستان کے ساتھ دوشنبہ میں شیڈول ہے۔
مزید پڑھیں
پاکستان ٹیم نے پرائیویٹ ایئر لائنز کی چارٹرڈ پرواز سے دو شنبہ روانہ ہونا تھا تاہم چارٹرڈ فلائٹ میں تکنیکی خرابی ہونے کی وجہ سے اسے روک دیا گیا۔
پاکستان فٹ بال اسکواڈ جہاز میں سوار ہونے کے لیے لاؤنج میں پہنچ چکا تھا جب بتایا گیا کہ پرواز میں فنی خرابی آگئی ہے۔
اس سے قبل قومی ٹیم نے فیصل آباد سے براستہ دبئی دوشنبہ جانا تھا تاہم نجی ایئرلائن کی پرواز 2 بار تاخیر کے بعد ہفتے کے روز منسوخ ہوگئی تھی۔
پاکستان فٹ بال فیڈریشن نے قومی ایئرلائن سے چارٹرڈ پرواز کے لیے رابطہ کیا تھا مگر وہاں سے کوئی جواب نہ ملنے پر وزیراعظم آفس سے رابطہ کیا گیا۔
اس سے قبل آج یہ خبریں سامنے آئی تھیں کہ پاکستان فٹ بال ٹیم تاجکستان روانہ ہوگئی ہے مگر اب یہ معلوم ہوا ہے کہ چارٹرڈ فلائٹ تکنیکی خرابی کا شکار ہوگئی ہے جس کی وجہ سے قومی ٹیم کی تاجکستان روانگی ایک بار پھر تاخیر کا شکار ہوگئی ہے۔
