ٹی20 ورلڈ کپ کی فاتح ٹیم بھارت کے کوچ راہول ڈریوڈ نے بھارتی کرکٹ بورڈ (بی سی سی آئی) کی جانب سے دی جانے والی 5 کروڑ کی انعامی رقم لینے سے انکار دیا۔
بی سی سی آئی کی جانب سے چیمپیئنز بننے کے فوری بعد یہ اعلان کیا گیا تھا کہ کرکٹ بورڈ کی جانب سے فاتح ٹیم کو 125 کروڑ روپے کی انعامی رقم دی جائے گی مگر وہ کس اعتبار سے تقسیم ہوگی اس بارے میں مکمل خاموشی تھی، تاہم 2 دن قبل بورڈ نے تفصیل جاری کرتے ہوئے بتایا کہ 15 رکنی دستے کو 5 کروڑ فی کس کے اعتبار سے پیسے دیے جائیں گے جبکہ کوچ راہول ڈریوڈ کو بھی اتنی ہی رقم دی جائے گی۔
مزید پڑھیں: ٹی20 ورلڈ کپ کی فاتح بھارتی ٹیم کے ہر کھلاڑی کو کتنی انعامی رقم ملے گی؟
اس کے علاوہ کوچنگ اسٹاف کے لیے ڈھائی کروڑ فی کس کا اعلان ہوا جبکہ وہ کھلاڑی جن کے نام ٹریولنگ ریزرو کے طور پر سامنے آئے تھے انہیں 1 کروڑ دیے جانے کا اعلان ہوا۔
تاہم راہول ڈریوڈ نے 5 کروڑ کی انعامی رقم لینے سے انکار کرتے ہوئے کہا ہے کہ کوچنک اسٹاف کے ہر فرد کو برابر رقم دی جائے۔ انہوں نے بورڈ سے درخواست کی کہ انہیں 5 کروڑ دینے کے بجائے ڈھائی کروڑ دیے جائیں تاکہ کوچنگ اسٹاف کے ہر فرد کو برابری کے اعتبار سے رقم تقسیم ہو۔
بھارتی میڈیا کے مطابق کرکٹ بورڈ نے راہول ڈریوڈ کے اس فیصلے کو سراہتے ہوئے کہا ہے کہ وہ ڈریوڈ کے جذبات کی قدر کرتے ہیں۔
واضح رہے کہ ڈریوڈ کی جانب سے پہلی بار ایسا عمل دیکھنے کو نہیں ملا بلکہ 2018 میں جب وہ انڈر 19 ٹیم کی کوچنگ کررہے تھے اس وقت بھی کرکٹ بورڈ نے ان کے لیے بطور کوچ 50 لاکھ جبکہ دیگر سپورٹ اسٹاف کے لیے 20 لاکھ کا اعلان کیا تھا، مگر ڈریوڈ کے کہنے پر ان سمیت تمام اسٹاف کو 25، 25 لاکھ روپے انعامی رقم دی گئی۔
