ڈائریکٹر حج مدینہ ضیا الرحمان نے عازمین حج کے لیے ہموار، پر سکون اور آرام دہ حج سہولیات کی فراہمی کے عزم کا اعادہ کرتے ہوئے کہا ہے کہ وزارت اس بات کو یقینی بنائے گی کہ حج 2025 کے دوران ہر پاکستانی عازمین کو مکمل اور آرام دہ سہولیات میسر ہوں۔
پاکستانی عازمین حج کے لیے ہموار، پرسکون اور آرام دہ حج کو یقینی بنانے کی جانب اہم قدم اٹھاتے ہوئے ڈائریکٹر حج مدینہ ضیا الرحمان نے حج 2025 کے لیے مستقبل کی منصوبہ بندی پر توجہ دینے کے لیے اعلیٰ سطح کے اجلاس کی صدارت کی۔
یہ بھی پڑھیں: روڈ ٹو مکہ پروجیکٹ: 16 ہزار عازمین حج کراچی سے رخصت کیے جائیں گے، ڈائریکٹر حج
اجلاس میں وزارت مذہبی امور کے اہم حکام نے شرکت کی جن میں ڈائریکٹر جنرل (آر اینڈ آر) مشاہد حسین سید، ڈپٹی سیکرٹری ناصر عزیز خان، ڈپٹی سیکرٹری آذر اقبال ہاشمی، ڈپٹی ڈائریکٹر حکیم خان خٹک اور اسسٹنٹ ڈائریکٹر جمیل الرحمان شامل تھے۔
اجلاس کا بنیادی ایجنڈا آئندہ حج کے دوران پاکستانی عازمین کو فراہم کی جانے والی سہولیات اور خدمات میں اضافے کے لیے حکمت عملی تیار کرنا تھا۔ حکمت عملی کا مقصد اس بات کو یقینی بنانا ہے کہ آئندہ تمام عازمین حج کو آرام دہ، مطمئن اور پرسکون حج سہولیات کے لیے ہم آہنگی اور فعال منصوبہ بندی کیسے تیار کی جائے۔
مزید پڑھیں: سعودی حکومت حج انتظامات میں جدت لارہی ہے، وفاقی وزیر مذہبی امور چوہدری سالک حسین
اجلاس کے دوران متعدد اہم نکات اٹھائے گئے جن میں رہائش، نقل و حمل کے انتظامات، حفظان صحت سے متعلق خدمات، تربیتی پروگراموں اور ڈیجیٹلائزیشن کے ذریعے معاونت شامل ہیں۔
مشاہد حسین سید نے بہتر مینجمنٹ اور خدمات کی فراہمی کے لیے ٹیکنالوجی سے استفادہ کرنے کے لیے وزارت کے عزم پر اظہار خیال کیا۔ آخر میں ضیا الرحمان نے وزارت مذہبی امور کے عزم کا اعادہ کرتے ہوئے کہا کہ وزارت اس بات کو یقینی بنائے گی کہ حج 2025 کے دوران ہر پاکستانی عازمین کو مکمل اور آرام دہ خدمات حاصل ہوں۔
