تحریک انصاف نے 38 آزاد اراکین قومی اسمبلی کی پارٹی سے وابستگی سے متعلق بیان حلفی الیکشن کمیشن میں جمع کرا دیے ہیں، تاہم پارٹی کے حمایت یافتہ بیرون ملک مقیم 3 مزید اراکین کے بیان حلفی پارٹی قیادت کو موصول ہوگئے ہیں جو آج جمع کرائے جائیں گے۔
پارٹی ذرائع کے مطابق صاحبزادہ محبوب سلطان، مبین عارف اور ریاض فتیانہ بیرون ملک ہیں، صاحبزادہ محبوب سلطان اور مبین عارف کے وابستگی فارم پارٹی کو موصول ہو چکے ہیں، جنہیں آج جمع کرائے جانے کا امکان ہے۔
یہ بھی پڑھیں: سپریم کورٹ کا مخصوص نشستیں پی ٹی آئی کو دینے کا فیصلہ
رہنما پی ٹی آئی اور رکن قومی اسمبلی اسد قیصر کے مطابق قومی اسمبلی کے تمام اراکین نے پی ٹی آئی کو اپنے وابستگی کے بیان حلفی پہنچا دیے ہیں، ایک ٹی وی انٹرویو میں ان کا کہنا تھا کہ الیکشن جیتنے والے پی ٹی آئی کے حمایت یافتہ اراکین قومی اسمبلی میں سے صرف 3 بیرون ملک تھے لیکن انہوں نے بھی اپنے حلف نامے پارٹی کو پہنچا دیے ہیں۔
اسد قیصر کے مطابق اغوا ہونیوالے رکن اسمبلی کے بیان حلفی بھی پی ٹی آئی کو موصول ہو چکے ہیں، انہوں نے بتایا کہ مخصوص نشستوں کے ملنے کے بعد تحریک انصاف قومی اسمبلی میں 115 نشستوں کے ساتھ سب سے بڑی پارلیمانی پارٹی بن جائے گی۔
مزید پڑھیں: مخصوص نشستیں: پی ٹی آئی کو تمام اراکین کے بیان حلفی موصول ہوگئے، اسد قیصر
اس سے قبل وی نیوز سے گفتگو میں پی ٹی آئی کے رکن قومی اسمبلی شیخ وقاص اکرم نے پی ٹی آئی میں فارورڈ بلاک کی تشکیل اور تقسیم کی باتوں کی تردید کی تھی، ان کے مطابق 41 اراکین قومی اسمبلی میں سے 38 کے وابستگی کے بیان حلفی جمع ہو چکے ہیں جبکہ دبئی میں مقیم 3 اراکین کے بیان حلفی متوقع ہیں۔
واضح رہے کہ سپریم کورٹ کے 13 رکنی فل کورٹ نے 12 جولائی کو پارلیمنٹ کی مخصوص نشستوں کے حصول کے لیے تحریک انصاف کی حمایت یافتہ سنی اتحاد کونسل کی درخواست پر مقدمے کا فیصلہ سناتے ہوئے مخصوص نشستیں پی ٹی آئی کا حق قرار دی تھیں۔
