صوبہ خیبر پختونخوا کے ضلع مردان میں شرپسندوں نے پولیس چوکی پر دستی بم سے حملہ اور فائرنگ کی، جس کے نتیجے میں ایک کانسٹیبل شہید جبکہ حولدار سمیت 3 پولیس جوان زخمی ہو گئے۔
یہ بھی پڑھیں: ڈیرہ اسماعیل خان: پولیس اسٹیشن پر دہشت گردوں کا حملہ، 10 پولیس اہلکار شہید 6 زخمی ہو گئے
صدر سرکل کے سپرنٹنڈنٹ آف پولیس (ایس پی) خالد خان نے ذرائع ابلاغ کو بتایا کہ صوبہ خیبر پختونحوا کے ضلع مردان کی تحصیل تخت بھائی میں آثار قدیمہ کے کھنڈرات میں واقع پولیس چوکی پر نا معلوم شر پسندوں نے اچانک دستی بم سے حملہ کیا اور ساتھ ہی فائرنگ بھی کر دی۔
خالد خان نے مزید بتایا کہ نامعلوم شرپسندوں کی فائرنگ سےلوند خوڑ سے تعلق رکھنے والے کانسٹیبل عمر نبی زخموں کی تاب نہ لاتے ہوئے شہید ہوگئے جب کہ حملے سے 3 پولیس اہلکار حوالدار شبیر ساکن خرکی اور کانسٹیبل محمد فیاض ساکن ٹکر تخت بھائی بری طرح زخمی ہوئے ہیں۔
مزید پڑھیں: پشاور میں پولیس وین پر حملہ، 2 اہلکار شہید ایک زخمی
سپرنٹنڈنٹ آف پولیس کا کہنا تھا کہ زخمیوں کو ابتدائی طور پر تخت بھائی ہیڈ کوارٹر اسپتال پہنچایا گیا جہاں سے انہیں بعدازاں ایم ایم سی اسپتال بھیج دیا گیا۔
ان کا کہنا تھا کہ شرپسندوں کی فائرنگ کے بعد علاقے میں پولیس کی بھاری نفری طلب کرلی گئی ہے اور سرچ آپریشن شروع کیا جا چکا ہے۔
