ڈیرہ اسماعیل خان میں پولیس موبائل کو نشانہ بنا کر کیا جانے والے بم دھماکے میں 3 اہلکاروں شہید ہوگئے۔
پولیس کے مطابق دھماکا پنیالہ پولیس کی حدود میں اس وقت ہوا جب پولیس موبائل معمول کی گشت پر تھی۔ دھماکے میں اے ایس آئی گل عالم، کانسٹیبل رفیق اور ڈرائیور سخی جان شہید ہوگئے، جبکہ کانسٹیبل آزاد شاہ خوش قسمتی سے محفوظ رہے۔
یہ بھی پڑھیے: بنوں میں سرکاری گاڑی پر حملہ، اسسٹنٹ کمشنر سمیت 4 افراد شہید، 3 زخمی
واقعے کے بعد علاقے کی ناکہ بندی کردی گئی ہے اور سرچ آپریشن جاری ہے۔ ڈی ایس پی پنیالہ اور ایس ایچ او موقع پر پہنچ گئے ہیں۔
صدر مملکت کی مذمت
صدرِ مملکت آصف علی زرداری نے ڈیرہ اسماعیل خان میں پولیس وین پر ہونے والے بزدلانہ دہشت گرد حملے کی شدید مذمت کرتے ہوئے جوانوں کی شہادت پر گہرے دکھ اور افسوس کا اظہار کیا ہے۔
صدر آصف علی زرداری نے شہدا کے لیے بلندیٔ درجات اور اہلِ خانہ کے لیے صبرِ جمیل کی دعا کی، جبکہ زخمی اہلکاروں کی جلد صحتیابی کی بھی دعا کی۔ انہوں نے کہا کہ قوم اپنے بہادر شہدا کو سلام پیش کرتی ہے جنہوں نے وطن کے امن کے لیے اپنی جانیں قربان کیں۔
یہ بھی پڑھیے: بنوں میں ایف سی لائن پر دہشتگردوں کا حملہ، 4 حملہ آور ہلاک، پولیس کی تصدیق
صدر مملکت نے دہشت گردی کے خلاف سیکیورٹی اداروں اور پولیس کی مسلسل قربانیوں اور مضبوط عزم کو خراجِ تحسین پیش کرتے ہوئے کہا کہ قوم، پولیس اور سیکیورٹی فورسز کے حوصلے کے سامنے بزدل دہشت گرد کبھی کامیاب نہیں ہو سکتے۔
انہوں نے اس عزم کا اعادہ کیا کہ دہشت گردی کے خاتمے تک پوری قوم اور ریاستی ادارے متحد رہیں گے۔
وزیر اعلیٰ خیبر پختونخوا کی مذمت
وزیر اعلیٰ خیبر پختونخوا محمد سہیل آفریدی نے واقعے کی مذمت کرتے ہوئے شہید اہلکاروں کو خراجِ عقیدت پیش کیا۔ انہوں نے کہا کہ شہدا نے اپنے خون کا نذرانہ پیش کر کے قوم کا سر فخر سے بلند کیا ہے۔
یہ بھی پڑھیے: مالم جبہ ریموٹ کنٹرول بم دھماکا، ایک پولیس جوان شہید، 3 زخمی
سہیل آفریدی کا کہنا تھا کہ پولیس کے جوان کم وسائل کے باوجود فرنٹ لائن پر دہشت گردی کا مقابلہ کر رہے ہیں۔ یہ کارروائی انتہائی بزدلانہ ہے، دشمن عناصر ایسے حملوں سے ہمارے حوصلے پست نہیں کر سکتے۔
وزیر اعلیٰ کی جانب سے شہید اہلکاروں کے درجات کی بلندی کے لیے خصوصی دعا کی گئی، جبکہ انہوں نے کہا کہ صوبائی حکومت شہدا کے لواحقین کے غم میں برابر کی شریک ہے اور انہیں ہر ممکن معاونت فراہم کی جائے گی۔
