جب خونی رشتوں میں سے ایک شخص دوسرے کو نقصان پہنچائے تو اکثر اس محاورے کا استعمال ہوتا تھا کہ خون سفید ہوگیا، لیکن پاکستان میں ان دنوں جو صورتحال ہے اس کو خون سفید ہونے سے تشبیہ نہیں دی جاسکتی، کیونکہ حکمرانوں نے عام آدمی کے لیے جینا مشکل بنا دیا ہے، بجلی کے بل زیادہ آنے کی بنیاد پر کرایہ داروں میں تو تلخی معمول کی بات ہوتی تھی مگر آج گوجرانوالہ میں پیش آنے والے واقعے نے بہت سے سوالات کو جنم دیا ہے۔
پنجاب کے علاقے گوجرانوالہ میں بجلی کا بل زیادہ آنے پر دو بھائیوں کے درمیان جھگڑا ہوا تو اسی دوران بڑے بھائی نے چھوٹے بھائی کو قتل کردیا۔
یہ بھی پڑھیں کیا حکومت بجلی بلنگ کا ناقص نظام ختم کر رہی ہے؟
پولیس نے بتایا ہے کہ گوجرانوالہ کے علاقے پرنس روڈ پر یہ واقعہ پیش آیا ہے جہاں بجلی کے بل کی رقم پر 2 بھائی آمنے سامنے آگئے اور جھگڑا ہوگیا۔
پولیس کے مطابق جھگڑے کے دوران بڑے بھائی نے چھوٹے بھائی کو موت کے گھاٹ اتار دیا، جبکہ ملزم کو گرفتار کرلیا گیا ہے۔
پولیس نے بتایا کہ دونوں بھائی محنت مزدوری سے گھر کا نظام چلاتے تھے اور ایک ہی مکان میں رہائش پذیر تھے، اور بجلی کا بل 10 ہزار 500 روپے آیا تھا۔
