بلوچستان کے سرحدی ضلع چمن میں پاکستان اور افغانستان کے درمیان موجودہ کشیدہ صورتحال کے پیش نظر انتظامیہ نے سرحدی علاقوں میں بسنے والے شہریوں کو احتیاطی تدابیر کے طور پر اپنے گھروں کو خالی کرنے کی ہدایت جاری کر دی ہیں۔
مزید پڑھیں: افغان طالبان کی بلااشتعال جارحیت کا مؤثر جواب، خیبرپختونخوا کے عوام کا افواجِ پاکستان سے اظہارِ یکجہتی
مقامی ذرائع کے مطابق شہر میں مجموعی طور پر امن و امان کی صورتحال برقرار ہے اور شہریوں نے اپنی افواج کے ساتھ مکمل یکجہتی کا اظہار کرتے ہوئے کہا ہے کہ وہ ہر مشکل گھڑی میں پاک فوج کے شانہ بشانہ کھڑے ہیں۔ شہریوں کا کہنا ہے کہ ملک کے دفاع کے لیے افواج پاکستان کی قربانیاں قابل فخر ہیں اور قوم ان کے ساتھ متحد ہے۔
صوبائی وزیر صحت بخت محمد کاکڑ کی ہدایت پر سرحدی علاقوں میں قائم تمام ہیلتھ مراکز میں ہائی الرٹ نافذ کر دیا گیا ہے۔ کسی بھی ممکنہ ہنگامی صورتحال سے نمٹنے کے لیے طبی عملے کو مکمل طور پر تیار رہنے کا حکم دیا گیا ہے جبکہ تمام ڈاکٹرز اور پیرامیڈیکل اسٹاف کو اپنی ڈیوٹی پر موجود رہنے اور ادویات و ایمبولینسز کو ہر وقت تیار رکھنے کی ہدایت جاری کی گئی ہے۔
اس کے علاوہ ضلع چمن کے ڈسٹرکٹ ہیڈکوارٹر اسپتال میں بھی باقاعدہ ایمرجنسی نافذ کر دی گئی ہے تاکہ کسی بھی غیر متوقع صورتحال میں فوری طبی امداد فراہم کی جا سکے۔
صوبائی وزیر صحت نے پاک افغان سرحد پر افغان طالبان کی جانب سے بلااشتعال فائرنگ کی شدید مذمت کرتے ہوئے کہا کہ پاکستان کی سیکیورٹی فورسز نے دشمن کی جارحیت کا بھرپور اور مؤثر جواب دیا ہے۔ انہوں نے کہا کہ جنرل عاصم منیر کی قیادت میں افواج پاکستان نے دشمن کے عزائم ناکام بنائے اور قوم کا سر فخر سے بلند کیا۔
انہوں نے مزید کہا کہ پاک فضائیہ اور دیگر سیکیورٹی ادارے ملک کے دفاع کے لیے ہمہ وقت تیار ہیں اور پاکستان اپنی سرحدوں کے تحفظ کی مکمل صلاحیت رکھتا ہے۔
مزید پڑھیں: ایران نے پاکستان اور افغانستان کے درمیان ایک بار پھر ثالثی کی پیشکش کردی
بخت محمد کاکڑ نے واضح کیا کہ قومی سلامتی پر کوئی سمجھوتا نہیں کیا جائے گا اور دشمن کو واضح پیغام مل چکا ہے کہ پاکستان اپنی خودمختاری اور سرحدوں کے دفاع کے لیے ہر ممکن اقدام کرے گا۔
دوسری جانب چمن اور ملحقہ علاقوں میں سیکیورٹی مزید سخت کر دی گئی ہے جبکہ متعلقہ ادارے صورتحال پر مسلسل نظر رکھے ہوئے ہیں۔
