محکمہ ایکسائز پنجاب نے گاڑیوں کی رجسٹریشن کے عمل کو محفوظ بنانے اور جعلی کاغذات کے استعمال سے نمٹنے کے لیے درآمد شدہ گاڑیوں کی دستاویزات کے لیے لازمی آن لائن تصدیق کا عمل متعارف کرایا ہے۔
نئی پالیسی کے تحت اب لاہور اور پنجاب کے دیگر تمام شہروں میں امپورٹڈ گاڑیوں کی دستاویزات کی آن لائن تصدیق کے بغیر رجسٹریشن پر پابندی عائد کردی گئی ہے۔
یہ بھی پڑھیں: اسلام آباد میں گاڑیوں کی رجسٹریشن اور نمبر پلیٹس کے حوالے سے قواعد میں بڑی تبدیلی
محکمہ ایکسائز نے درآمد شدہ گاڑیوں کی دستاویزات و اندراج کے لیے کسٹمز حکام کو ان کے آن لائن تصدیقی نظام تک رسائی کی درخواست بھی بھیج دی ہے۔
دونوں محکموں کے درمیان تعاون کا مقصد گاڑیوں کے رجسٹریشن کے عمل کو ہموار کرنا اور یہ یقینی بنانا ہے کہ صرف انہی گاڑیوں کی رجسٹریشن کی منظوری دی جائے گی جن کے کاغذات اصل ہوں گے۔
یہ بھی پڑھیں: نان کسٹم پیڈ گاڑیوں اور اسمگلنگ کے بارے میں ڈی جی آئی ایس پی آر نے کیا کہا؟
علاوہ ازیں، کسٹمز حکام نے اس بات پر زور دیا ہے کہ نیلامی کے ذریعے خریدی جانے والی گاڑیوں کی بھی رجسٹریشن سے قبل تصدیق ضروری ہے تاکہ جعلی دستاویزات والی گاڑیوں کی غیرقانونی رجسٹریشن کو روکا جاسکے۔
