وزیراعظم شہباز شریف نے کہا ہے کہ آرمی چیف کی قیادت میں ملک سے دہشتگردی کو ختم کردیں گے، ہم نے بلوچستان سے دہشتگردی کا مکمل خاتمہ اور صوبے کی ترقی و خوشحالی کی راہ میں حائل رکاوٹوں کو دور کرنا ہے۔
کوئٹہ میں بلوچستان ایپکس کمیٹی سے گفتگو کرتے ہوئے وزیراعظم شہباز شریف نے کہا کہ 26 اگست کو بلوچستان میں دلخراش واقعہ پیش آیا، خارجی پاکستان کے دشمن ہیں، دہشتگرد تنظیموں، خارجی دشمنوں اور گھس بیٹھیوں نے مل کر ناپاک منصوبہ بنایا مگر شہیدوں کو لہو رائیگاں نہیں جائے گا۔
یہ بھی پڑھیں: پی ٹی آئی نے بلوچستان میں ہونے والی دہشتگردی کو انٹیلی جنس کی ناکامی قرار دیدیا
وزیراعظم شہباز شریف نے کہا کہ 2018ء کے بعد دہشتگردی نے ایک بار پھر سر اٹھایا ہے جو اب کچل دیا جائے گا، ہم سب بلوچستان واقعہ پر غمزدہ ہیں، سیکیورٹی فورسز کے جوانوں اور شہریوں کو خون رائیگاں نہیں جائے گا، بلوچستان میں وفاق، آرمی چیف اور وزیراعلیٰ کے تعاون سے امن قائم کریں گے۔
واضح رہے کہ25 اور 26 اگست کی درمیانی شب بلوچستان کے مختلف اضلاع میں کی گئی دہشتگردانہ کارروائیوں میں 39 افراد جاں بحق ہوگئے تھے۔ بلوچستان کے ضلع موسیٰ خیل کے علاقے راڑہ شم میں مسلح افراد نے پنجاب سے تعلق رکھنے والے 23 مسافروں کو بسوں سے اتار کر فائرنگ کرکے قتل کردیا تھا۔ جبکہ دیگر افراد مختلف حملوں میں مارے گئے ہیں۔
یہ بھی پڑھیں بلوچستان، سیکیورٹی فورسز کے آپریشن میں 21 دہشتگرد ہلاک، 14 جوان شہید
دہشتگردی کے واقعات کے بعد بلوچستان کے مختلف علاقوں میں سیکیورٹی فورسز کے آپریشن کے دوران 21 دہشتگرد ہلاک ہوگئے تھے، ان آپریشنز کے دوران سیکیورٹی فورسز کے 14 جوان شہید ہوئے تھے۔
