امریکا میں یہودیوں کو قتل کرنے کی سازش کے الزام میں پاکستانی شہری کو کینیڈا میں گرفتار کرلیا گیا ہے۔
امریکی محکمہ انصاف کے مطابق ایک پاکستانی شہری کو کنیڈا کے صوبے کیوبک سے گرفتار کیا گیا، گرفتار پاکستانی شہری کی شناخت شاہزیب جدون کے نام سے کی گئی، جس کی عمر 20 سال ہے، ملزم پر الزام ہے کہ وہ بروکلین میں یہودی سینٹر میں خود کار اور نیم خود کار ہتھیاروں کے ذریعے قتل عام کا منصوبہ بنا رہا تھا،اس مقصد کے لیے اسے داعش کی حمایت بھی حاصل تھی۔
یہ بھی پڑھیں: جرمنی: حملہ کرنے کی منصوبہ بندی کے شبہے میں ایرانی شہری گرفتار
امریکی محکمہ انصاف کا کہنا ہے کہ منصوبے کو عملی جامہ پہنانے کے لیے ملزم کینیڈا سے نیویارک آرہا تھا، ملزم نے امریکی سرحد کے قریب پہنچنے تک اپنے سفر کے دوران 3 مرتبہ گاڑی بھی تبدیل کی۔
دوسری جانب کینیڈین حکام کا مؤقف ہے کہ شاہ زیب جدون کو 4 ستمبر کو اس وقت گرفتار کیا جب وہ امریکا میں داخل ہونے کی کوشش کررہا تھا، اسے امریکی ریاست نیویارک کی سرحد سے 12 میل کے فاصلے پر اورسمٹاؤن کے مقام سے حراست میں لیا گیا۔
امریکی اٹارنی جنرل میرک گارلینڈ کے مطابق وفاقی تحقیقاتی ادارے (ایف بی آئی) اور کینیڈا کے قانون نافذ کرنے والے اداروں کے فوری اقدام کی وجہ سے ملزم کو گرفتار کیا گیا ہے۔
یہ بھی پڑھیں: ہردیپ سنگھ نِجر کے قتل میں ملوث بھارتی شہریوں کی کینیڈا میں گرفتاری، امریکا کا ردعمل سامنے آگیا
میرک گارلینڈ نے ان سوالات کا جواب دینے سے انکار کر دیا ہے کہ ملزم شاہ زیب کو کہاں رکھا گیا ہے اور انہیں الزامات کا سامنا کرنے کے لیے کب امریکا لایا جائے گا، نہ ہی یہ واضح ہوسکا ہے کہ ملزم شاہ زیب کا کوئی وکیل ہے یا نہیں۔
ایف بی آئی کے ڈائریکٹر کرسٹوفر رے کے مطابق اسرائیل پر حماس کے حملے کے ایک سال بعد ملزم شاہ زیب امریکا میں یہودیوں کو قتل کرنے کا ارادہ رکھتا تھا، شاہ زیب نے اس بات کی تصدیق کی ہے کہ وہ اور امریکا میں مقیم داعش کا ایک حامی حملے کی منصوبہ بندی کررہے تھے۔
ایف بی آئی حکام کے مطابق شاہ زیب نے اپنے ممکنہ حملوں کی تفصیلات بتاتے ہوئے کہا کہ وہ اسرائیل پر 7 اکتوبر 2023 کو ہونے والے حملے کی برسی پر یا یہودیوں کے یومِ کپور پر 11 اکتوبر کو حملہ کرنے کا ارادہ رکھتے تھے۔
