ممتاز مذہبی اسکالر ڈاکٹر ذاکر نائیک نے جمعیت علما اسلام کے سربراہ مولانا فضل الرحمان سے ان کی رہائشگاہ پر جاکر ملاقات کی ہے، اس موقع پر ان کا کہنا تھا کہ مولانا فضل الرحمان سے ملاقات میری خواہش تھی جو آج پوری ہوئی۔
ترجمان جے یو آئی کے مطابق ڈاکٹر ذاکر نائیک نے امت مسلمہ کے اتحاد کے لیے مولانا فضل الرحمان کی کوششوں کو سراہا۔
یہ بھی پڑھیں 57 اسلامی ممالک موجود، مسئلہ فلسطین کے حل کے لیے نیٹو طرز کا اتحاد تشکیل دینا چاہیے، ڈاکٹر ذاکر نائیک
ترجمان نے کہاکہ مولانا فضل الرحمان نے ڈاکٹر ذاکر نائیک کا اپنی رہائشگاہ آمد پر استقبال کیا اور ان کی کاوشوں کو سراہا۔
اس موقع پر فضل الرحمان نے ڈاکٹر ذاکر نائیک کو کہاکہ آپ نے ہمارے گھر آکر ہمارے گھر کو رونق بخشی، جس طریقے سے آپ سوالوں کا جواب دیتے ہیں وہ امت مسلمہ کی طرف سے دفاع ہوتا ہے۔
جے یو آئی سربراہ نے کہاکہ عالم اسلام کے حسین چہرے سے دنیا کو روشناس کرانا اور امت مسلمہ کا اتحاد واتفاق مشترکہ ہدف ہے، ڈاکٹرصاحب یہاں مہمان نہیں میزبان ہیں یہ ان کا اپنا گھر ہے۔
ڈاکٹر ذاکر نائیک نے کہاکہ کل کچھ دوست ملنے آئے لیکن میں نے کہا سب سے پہلے مولانا فضل الرحمان سے ملاقات کروں گا، آج میں یہاں آکر اپنائیت محسوس کررہا ہوں۔
انہوں نے کہاکہ میرے نزدیک سب سے اہم پیشہ ڈاکٹری کا تھا، پھر قرآن کریم کا ترجمہ پڑھا تو معلوم ہوا سب اچھا پیشہ دعوت کا ہے۔
یہ بھی پڑھیں معروف اسلامی اسکالر ڈاکٹر ذاکر نائیک کہاں، کب اور کس موضوع پر لیچکر دیں گے؟
ترجمان جے یو آئی کے مطابق ڈاکٹرذاکر نائیک نے مولانا فضل الرحمان کو پرفیوم کا تحفہ دیا، اور انہی کی اقتدا میں مغرب کی نماز بھی ادا کی۔
