وزیراعلیٰ خیبرپختونخوا علی امین گنڈاپور نے کہا ہے کہ ہم فسطائیت کے باوجود اسلام آباد پہنچنے ہیں اور اپنا احتجاج ریکارڈ کرایا ہے، اب آئندہ کے لائحہ عمل کا اعلان عمران خان کریں گے۔
اسلام آباد پہنچنے کے بعد گفتگو کرتے ہوئے انہوں نے کہاکہ ہم نے پرامن طریقے سے اسلام آباد پہنچ کر ثابت کیاکہ ہم پرامن جماعت ہیں۔
یہ بھی پڑھیں علی امین گنڈاپور اسلام آباد پہنچ گئے، گرفتاری سے متعلق متضاد اطلاعات
علی امین گنڈاپور نے کہاکہ ہم پر گولیاں برسائی گئیں، لیکن ہم انتشار نہیں پھیلانا چاہتے، آئندہ کا جو بھی فیصلہ ہوگا وہ عمران خان کریں گے۔
واضح رہے کہ وزیراعلیٰ خیبرپختونخوا علی امین گنڈاپور کچھ دیر قبل اسلام آباد پہنچے اور خیبرپختونخوا ہاؤس پہنچنے جہاں ان کی گرفتاری کے حوالے سے متضاد خبریں سامنے آرہی ہیں۔
پی ٹی آئی کا دعویٰ ہے کہ علی امین گنڈاپور کو خیبرپختونخوا ہاؤس سے گرفتار کرلیا گیا ہے، جبکہ سرکاری ذرائع وزیراعلیٰ کی گرفتاری کی تردید کررہے ہیں۔
یہ بھی یاد رہے کہ بانی پی ٹی آئی عمران خان کی ہدایت پر پی ٹی آئی نے کل ڈی چوک میں احتجاج کی کال دی تھی، تاہم راستوں کی بندش کے باعث علی امین گنڈاپور کا قافلہ آج سہ پہر اسلام آباد پہنچا۔
یہ بھی پڑھیں لاہور میں پی ٹی آئی کا احتجاج، سلمان اکرم راجا سمیت متعدد کارکنان گرفتار
اس کے علاوہ پی ٹی آئی آج لاہور میں بھی احتجاج کررہی ہے، پارٹی رہنماؤں کا کہنا ہے کہ ہم مینار پاکستان پر عمران خان کی سالگرہ کا کیک کاٹیں گے، تاہم انتظامیہ نے راستے بند کررکھے ہیں اور صوبے میں فوج و رینجرز طلب کرلی گئی ہے۔
