اسلام آباد میں 26 نمبر چونگی پر احتجاجی مظاہرین کے پتھراؤ اور تشدد سے شدید زخمی ہونے والا پولیس اہلکار حمید شاہ زخموں کی تاب نہ لاتے ہوئے دم توڑ گیا۔ شہید اہلکار کی نماز جنازہ ڈی چوک میں ادا کردی گئی، نماز جنازہ میں وزیر داخلہ محسن نقوی، گورنر خیبرپختونخوا فیصل کریم کنڈی، آئی جی اسلام آباد علی ناصر رضوی سمیت کمشنر محمد علی رندھاوا اور آئی پنجاب عثمان انور نے شرکت کی۔
پی ٹی آئی احتجاج میں مظاہرین کے ہاتھوں تشدد کا نشانہ بننے کے بعد شہید ہونے والے اسلام آباد پولیس کے کانسٹیبل کی نماز جنازہ ڈی چوک میں ادا کی گئی
pic.twitter.com/0kG9gsoiS7— Awais Yousaf Zai (@awaisReporter) October 6, 2024
اسلام آباد میں 26 نمبر چونگی پر احتجاجی مظاہرین کے پتھراؤ اور تشدد سے شدید زخمی ہونے والا پولیس اہلکار عبدالحمید کو پمز اسپتال منتقل کیا گیا تھا جہاں وہ زخموں کی تاب نہ لاتے ہوئے ہفتہ اتوار کی شب، آخری پہر تقریباً 3 بجے دم توڑ گیا۔
ترجمان اسلام آباد پولیس کا کہنا ہے کہ سیاسی جماعت کا پرتشدد احتجاج پولیس افسر کی جان لے گیا۔ شرپسند عناصر پولیس کنسٹیبل عبدالحمید شاہ کو اغوا کے بعد تشدد کرتے رہے۔ بعدازاں انہیں پمز اسپتال منتقل کیا جہاں وہ زخموں کی تاب نہ لاتے ہوئے شہید ہوگئے۔
ترجمان اسلام آباد پولیس کے مطابق عبدالحمید 26 نمبر چونگی پر لاء اینڈ آرڈر ڈیوٹی پر تعینات تھے۔ وہ انویسٹی گیشن ونگ میں تعینات تھے۔ اور ایبٹ آباد کے رہائشی تھے۔
عبدالحمید نے اسلام آباد پولیس میں 1988 میں بھرتی ہوئے۔ انہوں نے 3 ماہ بعد پولیس سے سروس مکمل کرکے ریٹائر ہونا تھا۔
وزیر اعظم کا پولیس اہلکار کی شہادت پر گہرے دکھ کا اظہار
وزیراعظم محمد شہباز شریف نے پاکستان تحریک انصاف (پی ٹی آئی) مظاہرین کے پتھراؤ سے اسلام آباد پولیس کے اہلکار عبد الحمید کی شہادت پر گہرے دکھ اور افسوس کا اظہار کیا ہے۔
وزیر اعظم شہباز شریف نے واقعے کی مذمت کرتے ہوئے کہا کہ پی ٹی آئی نے ہمیشہ احتجاج کی آڑ میں تشدد کا راستہ اپنایا ہے۔ اس جماعت نے پہلے بھی سرکاری ٹیلی ویژن کی عمارت پر حملہ کیا اور پارلیمنٹ ہاؤس کا گیٹ توڑا۔
وزیر اعظم نے ہدایت کی کہ واقعے میں ملوث افراد کو کیفر کردار تک پہنچایا جائے۔
