بالی ووڈ انڈسٹری کے مسٹر پرفیکشنسٹ عامر خان کا کہنا ہے کہ طلاق نے ان کے اور سابقہ اہلیہ کرن راؤ کے تعلقات کو متاثر نہیں کیا۔
عامر خان نے حال ہی میں ہالی ووڈ رپورٹر کے ساتھ بات چیت کے دوران کہا کہ طلاق نے ان کے اور سابقہ اہلیہ کے ساتھ پیشہ وارانہ یا ذاتی تعلقات کو بالکل بھی متاثر نہیں کیا۔ ان کا کہنا تھا کہ طلاق کا مطلب یہ ہے کہ آپ ایک دوسرے سے علیحدگی اختیار کر رہے ہیں لیکن بطور انسان ایک دوسرے سے دور نہیں جا رہے اس لیے انہیں کبھی کسی قسم کی کوئی پریشانی نہیں ہوئی خاص طور پر اپنے کام کے حوالے سے۔
یہ بھی پڑھیں: کیا عامر خان تیسری شادی کرنے کا ارادہ رکھتے ہیں؟
عامر خان نے مزید کہا کہ طلاق ایک الگ موضوع ہے لیکن وہ اور کرن ایک دوسرے کے ذہنوں پر بھروسہ کرتے ہیں اس لیے وہ تخلیقی طور پر اچھا کام کرتے ہیں۔ اس بات پر کرن راؤ نے بھی اتفاق کیا اور کہا کہ ہم دونوں ایک دوسرے کی رائے کا احترام کرتے ہیں۔ کرن ماضی میں بھی عامر خان کے بارے میں کہہ چکی ہیں کہ وہ حقیقی طور پر ان بہترین لوگوں میں سے ایک ہیں جن کے ساتھ آپ تخلیقی کام کر سکتے ہیں۔ انہوں نےعامر خان کے ساتھ اپنی طلاق کو غیر معمولی قرار دیا تھا۔
واضح رہے عامر خان اور کرن راؤ نے باہمی رضامندی سے سال 2021 میں علیحدگی کا فیصلہ کیا تھا۔ 16 سالہ ازدواجی رفاقت کے خاتمے کے بعد بھی دونوں کے درمیان پیشہ وارانہ معاملات اور اپنے بیٹے آزاد کی پرورش کے حوالے سے اشتراک عمل جاری ہے۔
