چیمپیئنز ٹرافی کے لیے بھارت کے پاکستان آنے سے انکار پر پاکستان کرکٹ بورڈ (پی سی بی) نے انٹرنیشنل کرکٹ کونسل (آئی سی سی) کو خط لکھ دیا ہے۔ پی سی بی نے حکومتی ہدایت کو مدنظر رکھتے ہوئے آئی سی سی کو خط لکھا۔
بھارتی کرکٹ بورڈ (بی سی سی آئی) کی جانب سے چیمپیئنز ٹرافی کے لیے ٹیم کو پاکستان بھیجنے کے انکار پر پی سی بی نے سخت موقف اختیار کرتے ہوئے کسی بھی ہائبرڈ ماڈل کو قبول نہ کرنے کا فیصلہ کیا ہے، اور حکومتی موقف سے آئی سی سی کو آگاہ کردیا ہے۔
مزید پڑھیں: ’نواز شریف اگر مودی کو کال کریں تو بھارتی ٹیم پاکستان آسکتی ہے‘
پی سی بی کی جانب سے لکھے گئے خط میں ٹھوس وجوہات پوچھتے ہوئے لکھا کہ دیگر ٹیمیں پاکستان آسکتی ہیں تو بھارت کو کیا مسئلہ ہے۔ چیمپیئنز ٹرافی پاکستان میں ہی ہوگی، ہائبرڈ ماڈل قبول نہیں۔
خط کے متن میں لکھا کہ بھارت کے بغیر بھی پاکستان چیمپیئنز ٹرافی کروا سکتا ہے، بھارت کی جگہ کوئی اور ٹیم کو بھی بلوایا جاسکتا ہے۔ تاہم، سری لنکا یا ویسٹ انڈیز کو ایونٹ میں شرکت کے لیے بلایا جاسکتا ہے۔
یہ بھی پڑھیں: ’بھارت چیمپیئنز ٹرافی کھیلنے کے لیے نہ آیا تو پاکستان آئندہ ان کے ساتھ کوئی میچ نہیں کھیلے گا‘
خیال رہے گزشتہ روز وفاقی حکومت نے اس حوالے سے پی سی بی کو پالیسی گائیڈ لائنز سے آگاہ کیا تھا، جس میں بھارتی ٹیم کے انکار کی صورت میں کسی اور ٹیم کو مدعو کرنے کی بھی تجویز دی گئی تھی۔
واضح رہے وفاقی حکومت نے کرکٹ بورڈ کو واضح کیا ہے کہ پاک۔بھارت ٹاکرا پاکستان کے بغیر ممکن نہیں ہے، منافع صرف بھارت کی وجہ سے نہیں بلکہ پاکستان کی موجودگی سے ہے۔
