پنجاب کے ضلع میانوالی میں تھانہ چاپری پر خوارجی دہشتگردوں کا حملہ پنجاب پولیس نے ناکام بنادیا، اور اس دوران 4 دہشتگردوں کو بھی ہلاک کردیا گیا۔
ترجمان پنجاب پولیس کی جانب سے جاری بیان میں کہا گیا ہے کہ فتنہ الخوارج کے دہشتگردوں نے میانوالی کے تھانہ چاپری پر اچانک حملہ کیا، تاہم پنجاب پولیس نے حملہ ناکام بناتے ہوئے 4 دہشتگرد ہلاک کردیے۔
یہ بھی پڑھیں خیبرپختونخوا: سیکیورٹی فورسز نے فتنہ الخوارج کے 8 دہشتگرد ہلاک کردیے، کیپٹن سمیت 2 جوان شہید
ترجمان کے مطابق صوبہ خیبرپختونخوا سے متصل پنجاب کی بین الصوبائی سرحد پر عیسیٰ خیل سرکل کے تھانہ چاپری ہر دہشتگردوں نے حملہ کیا، جس میں 20 سے زیادہ دہشتگرد اسلحہ سے لیس تھے۔
ترجمان پنجاب پولیس نے بتایا کہ پنجاب پولیس نے خوارجی دہشتگردوں کو روکا تو اس دوران فائرنگ کا تبادلہ ہوگیا۔ جبکہ دہشتگردوں کی جانب سے تھانے کی عمارت پر راکٹ لانچرز اور ہینڈ گرنیڈز بھی پھینکے گئے۔
انہوں نے کہاکہ دہشتگردوں کے حملے میں 2 پولیس اہلکار معمولی زخمی ہوئے ہیں، جنہیں اسپتال منتقل کردیا گیا ہے۔
آئی جی پنجاب ڈاکٹر عثمان انور نے دہشتگردوں کا حملہ ناکام بنانے پر پنجاب پولیس کے جوانوں کو شاباش دی ہے۔
یہ بھی پڑھیں پنجگور میں دہشتگردوں کے ہاتھوں پنجاب سے تعلق رکھنے والے 7 مزدوروں کا سفاکانہ قتل
انہوں نے کہاکہ پنجاب پولیس امن دشمنوں کا بہادری سے مقابلہ کرتی رہے گی، اور ان کے ناپاک عزائم کو خاک میں ملا کر دم لیں گے۔
