پاکستان مسلم لیگ (ن) کے سینیئر رہنما اور متروکہ وقف املاک بورڈ کے سابق چیئرمین صدیق الفاروق انتقال کر گئے۔
میڈیا رپورٹس کے مطابق سابق وزیراعظم نوازشریف کے سابق پریس سیکرٹری، ہاؤس بلڈنگ فنانس کارپوریشن و متروکہ وقف املاک بورڈ کے سابق چیئرمین گردوں کے عارضے میں مبتلا تھے۔
صدیق الفاروق طویل عرصے تک شعبہ صحافت سے وابستہ رہے، وہ سینیئر صحافی اظہر ملک کے بڑے بھائی تھے۔ خاندانی ذرائع کے مطابق ان کی نماز جنازہ کی ادائیگی کا اعلان بعد میں کیا جائے گا۔
وزیراعظم محمد شہباز شریف صدیق الفاروق کے انتقال پر گہرے رنج اور افسوس کا اظہار
وزیراعظم محمد شہباز شریف نے پاکستان مسلم لیگ ن کے سینیئر رہنما، ہاؤس بلڈنگ فنانس کارپوریشن اور متروکہ وقف املاک بورڈ کے سابق چئیرمین صدیق الفاروق کے انتقال پر گہرے رنج اور افسوس کا اظہار کیا ہے۔
وزیراعظم نے مرحوم کی بلندی درجات کی دعا اور مرحوم کے اہل خانہ سے اظہار تعزیت کرتے ہوئے کہا کہ مرحوم صدیق الفاروق کی پاکستان مسلم لیگ ن کے لیے خدمات ہمیشہ یاد رکھی جائیں گی۔
ان کے انتقال سے پارٹی ایک مخلص اور زیرک سیاستدان سے محروم ہو گئی ہے۔ اللہ تعالیٰ مرحوم کو جنت الفردوس میں جگہ عطا فرمائے، آمین۔
