وزیراعلیٰ پنجاب مریم نواز نے حال ہی میں کینسر کے علاج کی جدید ترین ٹیکنالوجی متعارف کروانے کے لیے چینی کمپنی کیساتھ معاہدہ کیا ہے جس پر تجزیہ کار رضوان رضی نے پی ٹی وی کے ایک پروگرام میں بات کرتے ہوئے کہا کہ مشینری اور نئی ٹیکنالوجی آنے سے سرجری اور کیمو تھراپی کے بغیر کینسر کا علاج ممکن ہو سکےگا۔ کینسر اور اس کی کیمو تھیراپی کے نام پر جو کھربوں روپے لُوٹے جاتے ہیں اُس سے نجات مل جائےگی۔
رضوان رضی کے اس بیان پر سوشل میڈیا صارفین کی جانب سے خوب تنقید کی گئی تھی کہ پی ٹی وی جیسے سرکاری چینل پر بیٹھ کر عوام کو گمراہ کیا جا رہا ہے۔ پی ٹی وی پر کینسر کا غلط علاج بتانے پر ڈاکٹرز نے پریس ریلیز بھی جاری کرتے ہوئے رضوان رضی کے خیالات سے لاتعلقی کا بیان جاری کرنے کا مطالبہ کیا تھا اس حوالے سے اب پی ٹی وی نے وضاحت جاری کی ہے۔
یہ بھی پڑھیں: مریم نواز لائیں سرجری اور کیمو تھراپی کے بغیر کینسر کا علاج، ’کیا یہ بات چینیوں کو پتا ہے؟‘
اپنے وضاحتی بیان میں پی ٹی وی کا کہنا تھا کہ پی ٹی وی کے شو کے تجزیہ کاروں، میزبانوں اور مہمانوں کی آراء، خیالات اور تجزیے ان کے ذاتی نقطہ نظر پر مبنی ہیں اور یہ ضروری نہیں کہ وہ پی ٹی وی یا اس کی انتظامیہ کی سرکاری پوزیشن اور پالیسیوں یا آراء کی عکاسی کریں۔
Clarification issued by Pakistan Television Corporation regarding a discussion held in a television program that has recently drawn media attention: pic.twitter.com/zzrEg3vEjY
— PTV News (@PTVNewsOfficial) December 21, 2024
واضح رہے کہ وزیراعلیٰ پنجاب مریم نواز کے دورہ چین کے موقع پر چینی کمپنی ہائی جیا میڈیکل ٹیکنالوجیز کے ساتھ کینسر کے جدید طریقہ علاج Hygea اور اس کی مشینری کو پنجاب لانے کے لیے ایم او یو پر دستخط کیے گئے۔ ہائی جیا میڈیکل ٹیکنالوجیز کے صدر ڈاکٹر لوفولیانگ سے ملاقات کے بعد وزیر اعلیٰ پنجاب مریم نواز نے کہا کہ ہائی جیامیڈیکل ٹیکنالوجی کے حکام نے نواز شریف کینسر اسپتال کیلئے پروفیشنل معاونت کی یقین دہانی کروائی ہے۔
انہوں نے کہا کہ معاہدے کے بعد نواز شریف کینسر اسپتال میں چین کے تعاون سے جدید مشینری اور طریقہ علاج سے کینسر کے مریضوں کا علاج ہوگا۔
