پاکستان تحریک انصاف سندھ کے صدر و سابق وفاقی وزیر علی زیدی کو گرفتار کر لیا گیا ہے۔
پی ٹی آئی سندھ کے ترجمان نے بتایا ہے کہ علی زیدی کو صوبائی سیکرٹریٹ سے گرفتار کیا گیا ہے۔
پی ٹی آئی سندھ کے صدر علی زیدی کو کراچی میں خیابان راحت میں واقع دفتر سے گرفتار کرلیا گیا #ReleaseAliZaidi pic.twitter.com/Gy4t27v2y3
— PTI (@PTIofficial) April 15, 2023
ترجمان نے الزام لگایا ہے کہ اہلکار بغیر کسی وارنٹ کے پارٹی دفتر میں داخل ہوئے جب علی زیدی پی ٹی آئی سندھ سیکریٹریٹ میں تنظیمی عہدیداروں سے ملاقات کررہے تھے۔
پی ٹی آئی ترجمان نے کہا کہ سول کپڑوں اور یونیفارم میں ملبوس اہلکاروں نے علی زیدی کو گرفتار کر کے نا معلوم مقام پر منتقل کردیا ہے جبکہ اہلکار جاتے وقت دفتر سے کچھ افراد کے موبائل فونز بھی ساتھ لے گئے۔
انہوں نے کہا کہ پی ٹی آئی سندھ پارٹی دفتر پر غیر قانونی ریڈ اور صوبائی صدر کی گرفتاری کی مزمت کرتی ہے۔
دوسری جانب پی ٹی آئی سندھ کے جنرل سیکریٹری مبین جتوئی نے بھی علی زیدی کی گرفتاری پر رد عمل دیتے ہوئے آج افطار کے بعد سندھ بھر میں احتجاج کی کال دے دی ہے۔
جنرل سیکریٹری مبین جتوئی کا کہنا ہے کہ امپورٹڈ حکومت نے اپنے غنڈوں سے پی ٹی آئی کے صوبائی سیکریٹریٹ پر حملہ کروایا ہے۔
مبین جتوئی نے کہا ہے کہ دفتر پر حملہ کر کے علی زیدی کو بغیر کسی وارنٹ کے گرفتار کیا گیا جس کی شدید الفاظ میں مذمت کرتے ہیں۔
ان کا کہنا تھا کہ امپورٹڈ حکومت اور انکے ہینڈلرز ہر گزرتے دن کے ساتھ ذہنی دباؤ میں مبتلا ہورہے ہیں لیکن ان حربوں سے سندھ میں پی ٹی آئی کو کمزور نہیں کیا جا سکتا۔
انہوں نے مزید کہا کہ امپورٹڈ حکومت اوچھے ہتھکنڈوں سے باز رہے اور علی زیدی کو فوری رہا کرے۔
علی زیدی کی بازیابی کے لیے درخشاں پولیس اسٹیشن میں درخواست
دریں اثناء انصاف لائرز فورم کراچی کے صدر ظہور محسود ایڈووکیٹ نے علی زیدی کی بازیابی کے لئے درخشاں پولیس اسٹیشن میں درخواست دے دی ہے۔
ظہور محسود ایڈووکیٹ نے موقف اختیار کیا ہے کہ علی زیدی کو بخاری کمرشل پر واقع انکے دفتر سے نامعلوم سادہ لباس اہلکار اپنے ہمراہ لے گئے ہیں۔ علی زیدی کو کراچی بھر کے تھانوں میں تلاش کیا لیکن کچھ پتہ نہیں چل سکا۔
ظہور محسود ایڈووکیٹ نے کہا ہے کہ علی زیدی کی موجودگی کی تصدیق کسی تھانے سے نہیں ہوسکی لہٰذا علی زیدی کو بازیاب کروایا جائے۔
