پنجاب کی نگران حکومت آئینی مشکلات سے دوچار، پی ٹی آئی کا صدر کو خط لکھنے کا فیصلہ

پنجاب کی نگران حکومت آئینی مشکلات سے دوچار ہے اور تحریک انصاف نے نگران حکومت کے 90 روز مکمل ہونے پر صدر مملکت کو خط لکھنے کا فیصلہ کیا ہے۔

پنجاب میں پرویز الٰہی کی حکومت ختم ہونے کے 90 روز مکمل ہوگئے ہیں۔

تحریک انصاف کے مرکزی رہنماء فواد چوہدری صدرمملکت عارف علوی کو خط لکھیں گے جس میں کہا جائے گا کہ محسن نقوی کی نگران حکومت 3 ماہ کے لیے بنائی گئی تھی۔

نگران حکومت کی آئینی مدت 22 اپریل کو ختم ہو جائے گی، فواد چوہدری

فواد چوہدری کا کہنا ہے کہ محسن نقوی کی نگران حکومت کی آئینی مدت 22 اپریل کو مکمل ہو جائے گی جس کے بعد صدر مملکت سے درخواست کی جائے گی تحریک انصاف کی جانب سے متوقع طور پر بھجوائے جانے والے مکتوب کو ریفرنس کے طور پر سپریم کورٹ بھجوائیں۔

انہوں نے کہا کہ تحریک انصاف اس معاملے پر خود بھی عدالت عظمیٰ سے استدعا کرے گی کیوں کہ 22 اپریل کے بعد نگران حکومت کی آئینی حیثیت ختم ہو جائے گی۔

انہوں نے کہا کہ عدالت عظمیٰ سے استدعا کی جائے گی کہ پنجاب اور خیبر پختونخوا کی نگران حکومتیں الیکشن کروانے کے اپنے مینڈیٹ کو پورا کرنے میں ناکام ہو چکی ہیں اس لیے انتظامی معاملات کو چلانے کے لیے طریقہ کار واضح کیا جائے۔

فواد چوہدری نے کہا کہ 22 اپریل کے بعد محسن نقوی اور ان کی کابینہ کے تمام اقدامات غیر آئینی اور غیر قانونی ہوں گے۔