بانی چیئرمین پاکستان تحریک انصاف(پی ٹی آئی) عمران خان اور ان کی اہلیہ بشریٰ بی بی کے خلاف توشہ خانہ ٹو کیس میں وکلائے صفائی نے استغاثہ کے گواہ پر جرح مکمل کرلی جبکہ استغاثہ کے ایک گواہ کا بیان قلمند بند کردیا گیا ہے۔
اڈیایہ جیل میں اسپیشل جج سینٹرل شاہ رخ ارجمند نے عمران خان اور ان کی اہلیہ بشریٰ بی بی کے خلاف توشہ خانہ ٹو کیس کی سماعت کی، بانی پی ٹی آئی اور بشریٰ بی بی کو عدالت میں پیش کیا گیا۔
یہ بھی پڑھیں: توشہ خانہ ٹو کیس: عمران خان کو ملنے والے 108 تحائف کی فہرست عدالت میں پیش
کیس کی سماعت کے دوران وکلائے صفائی نے کابینہ ڈویژن کے سیکشن آفیسر برائے توشہ خانہ بنیامین پر جرح مکمل کی جبکہ گواہ، ڈپٹی سیکریٹری کابینہ ڈویژن محمد احد کا بیان بھی ریکارڈ کیا گیا۔
عدالت نے کیس کی سماعت 8 جنوری تک ملتوی کردی،، 8 جنوری کو سماعت پر وکلائے صفائی گواہ محمد احد پر جرح کریں گے۔
واضح رہے کہ توشہ خانہ ٹو کیس میں مجموعی طور پر 4 گواہان کی شہادت قلمبند کی جاچکی ہے، 12 ستمبر 2024 کو توشہ خانہ ٹو کیس کی تحقیقات کے لیے ایف آئی اے کی 3 رکنی جوائنٹ انویسٹی گیشن ٹیم (جے آئی ٹی) تشکیل دے دی گئی تھی۔
یہ بھی پڑھیں: توشہ خانہ کیس 2 میں عمران خان اور بشریٰ بی بی پر فرد جرم عائد
نیب ترامیم کے حوالے سے سپریم کورٹ کے فیصلے کے بعد احتساب عدالت نے بانی پاکستان تحریک انصاف (پی ٹی آئی) عمران خان اور بشریٰ بی بی کے خلاف توشہ خانہ ٹو ریفرنس نیب سے ایف آئی اے کو منتقل کردیا تھا۔
قبل ازیں، عدالت نے توشہ خانہ 2 ریفرنس کا ریکارڈ اسپیشل جج سینٹرل کی عدالت کو منتقل کرنے کا حکم دیا تھا۔ جبکہ 13 جولائی کو نیب نے عمران خان اور ان کی اہلیہ کو عدت نکاح کیس میں ضمانت ملنے کے فوری بعد توشہ خانہ کے ایک نئے ریفرنس میں گرفتار کرلیا تھا۔
نیب کی انکوائری رپورٹ کے مطابق نیا کیس 7 گھڑیوں سمیت 10 قیمتی تحائف خلاف قانون پاس رکھنے اور بیچنے سے متعلق ہے۔
