پاکستان رواں ہفتے وزیر اعظم شہباز شریف کی میزبانی میں 2 روزہ بین الاقوامی کانفرنس کا انعقاد کرنے جارہا ہے۔
سفارتی ذرائع کے مطابق یہ 2 روزہ کانفرنس مسلم معاشروں میں خواتین کی تعلیم چیلنجز اور مواقع کے عنوان سے منعقد کی جا رہی ہے۔ کانفرنس میں شرکت کے لیے 30 ممالک کے 55 کے قریب وفود شرکت کر رہے ہیں۔
ذرائع کے مطابق کانفرنس کی میزبانی رابطہ العالم الاسلامی اور وزیر اعظم شہباز شریف مشترکہ طور پر کر رہے ہیں۔ کانفرنس کا مقصد بچیوں کی تعلیم کے حوالے سے حکومتوں، اسلامی و سول سوسائٹی کی تنظیموں کے درمیان نیٹ ورک کا قیام ہے۔
یہ بھی پڑھیے:ایس سی او سمٹ کتنی کامیاب رہی؟
جناح کنونشن سینٹر میں منعقدہ 2 روزہ کانفرنس کا افتتاح وزیر اعظم شہباز شریف کریں گے جس میں او آئی سی کے سیکرٹری جنرل حسین ابراہیم طہ، نائب وزیراعظم اسحاق ڈار اور دیگر وزرا شرکت کریں گے۔
ذرائع کے مطابق کانفرنس میں او آئی سی کے نمائندہ خصوصی برائے افغانستان طارق بخیت اور او آئی سی کے دیگر حکام بھی شرکت کریں گے۔
سفارتی ذرائع نے بتایا کہ کانفرنس میں شریک ہونے کے لیے 30 سے زائد ممالک کے وزرائے تعلیم پاکستان پہنچ رہے ہیں۔ پاکستان آنے والے وفود میں سعودی عرب، ترکیہ، متحدہ عرب امارات، ایران، آذربائیجان، قازقستان، ترکمانستان سمیت متعدد مسلم ممالک کے وفود شامل ہیں۔
