پاکستان تحریک انصاف (پی ٹی آئی) کے بانی عمران خان کی ہمشیرہ علیمہ خان نے کہا ہے کہ 190 ملین پاؤنڈ کیس میں آصف زرداری نے سہولت کاری کی لیکن سزا عمران خان کو سنائی جارہی ہے۔
یہ بھی پڑھیں 190 ملین پاؤنڈ کی رقم کیسے سپریم کورٹ اکاؤنٹ میں پہنچی، سلمان اکرم راجہ نے تفصیلات شیئر کردیں
اڈیالہ جیل کے باہر میڈیا سے گفتگو کرتے ہوئے انہوں نے کہاکہ کہا جاتا ہے یہ رقم عمران خان نے چوری کرلی، جبکہ انگلینڈ کی ایجنسی کا مؤقف ہے کہ یہ رقم پراپرٹی ٹائیکون نے حسن نواز کو رشوت کے طور پر دی تھی، اگر ایسا ہے تو پھر نواز شریف کو بھی جواب دینا چاہیے۔
علیمہ خان نے کہاکہ پراپرٹی ٹائیکون نے این سی اے سے ڈیل کرکے یہ رقم پاکستان واپس لائی جس سے ملک کا فائدہ ہوا۔ جو جرمانہ عائد کیا گیا اس کی سہولت کاری آصف زرداری نے کی مگر عمران خان کو سزا اس لیے دی جارہی ہے کہ ایسا ادارہ کیوں بنایا جہاں سیرت النبیﷺ سے متعلق تعلیم دی جارہی ہے۔
انہوں نے کہاکہ عمران خان کو سزا دینے میں کافی مشکل پیش آرہی ہے، کیونکہ القادر ٹرسٹ تو فلاحی ادارہ ہے۔ عمران خان بھی چاہتے ہیں کہ سزا سنائی جائے تاکہ ہم ہائیکورٹ سے رجوع کریں۔
انہوں نے کہاکہ عمران خان ہر طرح کے کیسز کا سامنا کرنے کے لیے تیار ہیں، عمران خان جب باہر آئیں گے تو آپ سب دیکھ لیں گے۔
یہ بھی پڑھیں 190 ملین پاؤنڈ کیس: بریت ہوئی تو ہمیں حیرانی ہوگی، پی ٹی آئی رہنما
واضح رہے کہ احتساب عدالت نے 190 ملین پاؤنڈ کیس کا فیصلہ تیسری بار مؤخر کرتے ہوئے اب 17 جنوری کی تاریخ مقرر کی ہے۔
