وزیر داخلہ محسن نقوی نے نادرا میگا سینٹر ناظم آباد میں نئے پاسپورٹ آفس کا افتتاح کیا ہے۔ نئے پاسپورٹ آفس میں شہریوں کو 24 گھنٹے، 3 شفٹوں میں خدمات فراہم کی جائیں گی، جس سے وہ کسی بھی وقت اپنا پاسپورٹ بنوا سکیں گے۔
افتتاحی تقریب کے دوران وزیر داخلہ محسن نقوی نے پاسپورٹ بنوانے کے کاؤنٹرز کا معائنہ کیا اور عملے سے ملاقات کی۔ انہوں نے نادرا میگا سنٹر میں شناختی کارڈ اور پاسپورٹ بنوانے کے لیے آنے والے شہریوں سے بھی ملاقات کی اور ان کے تجربات کے بارے میں دریافت کیا۔
مزید پڑھیں: پاسپورٹ اینڈ امیگریشن آفس کو سیاہی کا بحران درپیش، پاسپورٹس کے اجرا میں تاخیر کا خدشہ
شہریوں نے بہترین سہولتوں کی فراہمی پر اطمینان کا اظہار کرتے ہوئے وزیر داخلہ کا شکریہ ادا کیا۔ شہریوں نے کہا کہ یہ زبردست سہولت ہے اور اس سے عوام کو بہت آسانیاں حاصل ہوں گی۔
محسن نقوی نے بے نظیر انکم سپورٹ پروگرام کے تحت بائیو میٹرک کرانے کے لیے آنے والی خواتین کے مسائل بھی سنے اور موقع پر ہی متعلقہ حکام کو ان کے فوری حل کے لیے ہدایات جاری کیں۔ بزرگ خواتین نے فوری احکامات جاری کرنے پر وزیر داخلہ کا شکریہ ادا کیا، جس پر محسن نقوی نے کہا کہ عوام کے مسائل حل کرنا حکومت کی ذمہ داری ہے۔
مزید پڑھیں: پاسپورٹ آفس: ایجنٹ مافیا غائب، لمبی قطاریں نہ غیر ضروری انتظار کی زحمت مگر کیسے؟
نادرا سینٹر میں قائم پاسپورٹ آفس کی ورکنگ کے حوالے سے وفاقی وزیر داخلہ کو تفصیلی بریفنگ دی گئی۔ اس موقع پر ڈی جی پاسپورٹ مصطفیٰ جمال قاضی سمیت دیگر اعلیٰ حکام بھی موجود تھے۔
