قومی کرکٹ ٹیم کے تیز رفتار بولر نسیم شاہ نے پاکستان کے دورے پر آئے نیوزی لینڈ کے کھلاڑیوں کو عید منانے کی تفصیلات سے آگاہ کرتے ہوئے انہیں شیر خرما بھی کھلایا۔
پاکستان کرکٹ بورڈ نے ایک ویڈیو شیئرکی ہے جس میں نسیم شاہ مہمان کھلاڑیوں کو بتارہے ہیں کہ پاکستانی کس طرح عید مناتے ہیں اور اس دن ان کے معمولات کیا ہوتے ہیں۔
نسیم شاہ نے کھلاڑیوں کو بتایا کہ عید کے روز لوگ نئے کپڑے پہن کر عید کی نماز پڑھنے جاتے ہیں جس کے بعد وہ ایک دوسرے سے گلے مل کر عید کی مبارکباد دیتے ہیں۔ وہ اس موقع پر اٹھ کر کھڑے ہوئے اور نیوزی لینڈ کے کھلاڑیوں سے تین تین مرتبہ گلے ملنے کے بعد مصافحہ کرکے انہیں عید مبارک کہا۔
نیوزی لینڈ کے کھلاڑی بڑی دلچسپی اور انہماک سے نسیم شاہ کی باتیں سنتے رہے۔ اس دوران پاکستانی بولر نے مہمانوں کو یہ بھی بتایا کہ عید کے موقع پر لوگ عیدیاں بھی بانٹتے ہیں تاہم انہوں نے ساتھ میں یہ بھی کہا کہ ’اس وقت آپ کو دینے کے لیے میرے پاس پیسے نہیں‘ جس پر مہمان کھلاڑی ہنس پڑے۔
A sweet way to celebrate Eid with our guests 🎉🍮
Speedster @iNaseemShah shares the joy of Eid and introduces the New Zealand cricketers to sheer khurma 🇵🇰🇳🇿#PAKvNZ | #CricketMubarak pic.twitter.com/U26dlYzSyq
— Pakistan Cricket (@TheRealPCB) April 24, 2023
نسیم شاہ نے کہا کہ عید کا دن ہمارے لیے بہت خاص ہوتا ہے اور اس روز ہم شیرخرما بنانے کا بھی خاص اہتمام کرتے ہیں۔ پھر انہوں نے نیزی لینڈ کے مہمان کھلاڑیوں کواپنے ہاتھ سے شیر خرما بھی کھلایا جس کی مہمانوں نے خوب تعریف کی۔
اس موقع پر پاکستانی بولر نے کہا کہ ہم جس ملک بھی جاتے ہیں ہمیں وہاں کا کلچر دیکھنے کے ساتھ وہاں کے روایتی کھانوں سے بھی لطف اندوز ہونا چاہیے اس سے ہمیں مختلف معاشروں کے فرق اور خصوصیات کا بھی پتا چلتا ہے۔
