پاکستان پیپلزپارٹی کے چیئرمین بلاول بھٹو زرداری نے کہا ہے کہ صدر مملکت آصف علی زرداری نے کل پارلیمان سے تاریخی خطاب کیا، یہ پہلی بار ہوا کہ پاکستان میں کسی سویلین صدر نے 8ویں بار پارلیمنٹ سے خطاب کیا ہو۔
بلاول بھٹو کا کہنا تھا کہ صدر مملکت نے اپنی تقریر میں نفرت کے بجائے امید کی بات کی، انہوں نے حکومت کی یکطرفہ پالیسیوں پر بھی تبصرہ کیا، صدر نے نئی نہروں کے حوالے سے مثبت انداز میں حکومت کو خبردار کیا کیوں کہ حکومت کے اس فیصلے سے وفاق پر ایک نشان لگ رہا ہے۔
یہ بھی پڑھیے: پیپلزپارٹی کا وزیراعظم شہباز شریف کی قیادت میں قائم حکومت پر مکمل اعتماد کا اظہار
ان کا کہنا تھا کہ نئی نہروں کے حوالے سے سندھ کے بہت سارے خدشات ہیں، اس لیے ان نہروں کے معاملے پر متفقہ فیصلے لینے چاہئیں، وزیراعظم شہباز شریف کو افطار ڈنر کے موقع پر بھی پارٹی کے تحفظات سے بھی آگاہ کردیا ہے۔
انہوں نے کہا کہ یہ سفید جھوٹ ہے کہ پانی کے مسئلے پر ہم خاموش ہیں، پانی زندگی اور موت کا مسئلہ ہے اور پیپلز پارٹی ہی واحد جماعت ہے جو پانی کی تقسیم کے مسئلے پر ہمیشہ آواز اٹھاتی ہے۔ ان کا کہنا تھا کہ نہروں کا معاملہ مشترکہ مفادات کونسل کا معاملہ ہے لیکن کونسل کا اجلاس ایک سال سے نہیں ہوا۔
مزید پڑھیں: صدر زرداری کے خطاب کے دوران ہلڑ بازی، بلاول بھٹو نے اپوزیشن کو غیرسنجیدہ قرار دے دیا
بلاول بھٹو نے خیبرپختونخوا حکومت پر تنقید کرتے ہوئے کہا کہ کبھی بھی نہیں دیکھا کہ کسی صوبائی حکومت کو صوبے کے مسائل حل کرنے میں دلچسپی نہ ہو لیکن وزیراعلیٰ خیبرپختونخوا کو بڑھتی ہوئی دہشتگردی کی پرواہ ہی نہیں۔ وفاق کی ذمہ داری ہے کہ خیبرپختونخوا میں بڑھتی ہوئی دہشتگردی کا مسئلہ خود دیکھے۔
انہوں نے مزید کہا کہ امید ہے کہ حکومت سے ہماری بات چلتی رہے گی، پیپلز پارٹی مثبت سیاست پر یقین رکھتی ہے۔
واضح رہے کہ بلاول بھٹو زرداری نے کل وفد کے ہمراہ وزیراعظم شہباز شریف سے ملاقات کی تھی۔ وفد کے شرکا نے گفتگو کرتے ہوئے کہا کہ پاکستان پیپلزپارٹی ملکی ترقی و معاشی استحکام اور عام آدمی کی زندگی کو بہتر بنانے کے لیے حکومت ہر اقدام میں حکومت سے مکمل تعاون فراہم کرے گی۔
پاکستان پیپلز پارٹی نے وزیراعظم کے حکومتی امور میں اتحادیوں سے مشاورت، ان کی رائے کے احترام اور ان کو اعتماد میں لینے کے اقدام پر وزیراعظم کا شکریہ ادا کیا۔
