قومی اسمبلی میں بتایا گیا ہے کہ ملک میں شرح خواندگی 62.8 فیصد ہے جبکہ 2 کروڑ 30 لاکھ بچے تعلیم سے محروم ہیں۔
قومی اسمبلی کا اجلاس پینل آف چیئرمین کے رکن محمود بشیر ورک کی صدارت میں منعقد ہوا۔ اجلاس میں وقفہ سوالات میں وزیر برائے وفاقی تعلیم رانا تنویر حسین نے ایوان کو بتایا کہ اٹھارہویں آئینی ترمیم میں دستور پاکستان، 1973ء میں متعدد تبدیلیاں متعارف کرائی گئیں۔
وفاق اور پاکستان کی وفاقی اکائیوں کے مابین رشتہ کی موجودہ نوعیت کی دوبارہ تعریف کی گئی ہے۔ اس کا وفاقی اور صوبائی سطحوں پر قانون سازی دائرہ اختیار اور انتظامی اتھارٹیز پر بھی گہرا اثر مرتب ہوا ہے۔ تعلیم کلیدی موضوعات میں سے ایک ہے جو صوبائی اختیار کو منتقل کیا گیا ہے۔
اقتصادی سروے، 22-2021 ء کے مطابق 19-2018ء میں 62.4 فیصد کے مقابلے میں موجودہ شرح خواندگی 62.8 فیصد ہے۔ وزیر تعلیم نے مزید بتایا کہ انفراسٹرکچر کا شدید فقدان ہے۔ مسجد سکول کا اجراء ممکن بنایا جا رہا ہے۔ اس وقت 2 کروڑ 30 لاکھ بچے تعلیم سے محروم ہیں۔ قومی اسمبلی کا اجلاس بدھ 3 مئی کی شام چار بجے تک ملتوی کردیا گیا۔
