ڈپٹی وزیراعظم اور وزیر خارجہ اسحاق ڈار نے کہا ہے کہ بیلاروس کا دورہ کامیاب تھا، ڈیڑھ لاکھ ہنرمند افرادی قوت کو کام کے مواقع دینے اور ہیوی مشینری بنانے میں تعاون کی باتیں ہوئیں، میاں نواز شریف کی بیلاروس کے صدر کے ساتھ بہت قریبی دوستی ہے۔
لندن میں میڈیا سے غیررسمی گفتگو کرتے ہوئے ان کا کہنا تھا کہ یہ ایک پورا عمل ہے، وہ ہمیں تفصیل دیں گے کہ انہیں کن شعبوں میں لوگ چاہئیں، وہ پوری دنیا سے لوگ لے رہے تھے مگر ہماری درخواست پر یہ پورا کوٹہ پاکستان کو دینے پر تیار ہوگئے۔
یہ بھی پڑھیے: کیا نواز شریف کی واپسی بلوچستان کی سیاست کا رخ بدل دے گی؟
بانی پی ٹی آئی عمران خان سے متعلق انہوں نے کہا کہ فتنے سے کوئی ڈیل نہیں ہوگی، بات چیت کے لیے سرنڈر کرنا ہوگا، کہا تو یہ جارہا تھا کہ ایک صدر آئیں گے تو وہ باہر آجائے گا۔
اسحاق ڈار کا کہنا تھا کہ 9 مئی میں انصاف ہوتا نظر آرہا ہے، اس میں جو ملوث تھے وہ قیمت چکا رہے ہیں۔ اگر کسی کو قانونی عمل کے ذریعے سزا ہوئی ہے تو ہم کیا کرسکتے ہیں، لاکھوں ڈالر دے کر پاکستانی اداروں کو بدنام کرنا قابل مذمت ہے، افواہیں پھیلانے والے ملک کی خدمت نہیں کررہے۔
یہ بھی پڑھیے: نواز شریف کی سیاست میں دوبارہ انٹری، اندر کی خبریں کیا ہیں؟۔ بلوچستان کی صورتحال
نواز شریف کی سیاست میں واپسی کے سوال کے جواب میں ڈپٹی وزیراعظم کا کہنا تھا کہ وہ سیاست سے نکلے کب تھے، وہ مسلم لیگ ن کے صدر ہیں، پوری پارٹی چلاتے ہیں، ہم ان سے رہنمائی لیتے ہیں، ان سے رہنمائی صوبائی اور وفاقی حکومت دونوں لیتی ہیں۔
ان کا کہنا تھا کہ اوورسیز کنونشن میں یہاں کے کابینہ کے پاکستانی نژاد ممبران آرہے ہیں، آزاد کشمیر میں بین الاقوامی ایئرپورٹ کے لیے یہاں کے ایم پیز نے خط لکھا تھا، اس کی فیزیبیلٹی کے لیے ہم نے اشتہارات دیے ہیں، وزیراعظم اس حوالے سے اسلام آباد میں اوورسیز کنونشن میں اعلان بھی کریں گے۔
