آسٹریلیا سے تعلق رکھنے والی مشہور اسپورٹس پریزنٹر جو اکثر پاکستانی ثقافت کو سراہتی ہوئی نظر آتی ہیں کراچی کی مشہور نلی بریانی کی تعریف کرنے پر مجبور ہو گئیں۔
پاکستان سپرلیگ (پی ایس ایل) 2025 کے دسویں ایڈیشن میں کمنٹری پینل میں شامل ایرن ہالینڈ نے ساتھی میزبان سے پوچھا کہ انہیں پاکستان میں کیا چیز ٹرائی کرنی چاہیے جس پر انہوں نے کہا کہ آپ کو نلی بریانی ضرور ٹرائی کرنی چاہیے۔
آسٹریلوی پریزنٹر کراچی کی مشہور نلی بریانی کھانے لیاقت آباد پہنچیں تو انہیں وہاں دیکھ کر لوگوں کی بڑی تعداد بھی جمع ہو گئی جو ان کے ساتھ تصاویر اور ویڈیوز بناتی دکھائی دی۔
ایرن ہالینڈ نے دکانداروں سے پوچھا کہ وہ بریانی کیسے بناتے ہیں جس پر انہوں نے بتایا کہ اس میں گھی یا تیل کا استعمال نہیں کیا جاتا بلکہ یہ نلی اور گوشت کی یخنی سے تیار کی جاتی ہے۔ انہوں نے سوال کیا کہ کیا یہ بہت مرچ مصالحوں والی بریانی ہے جس پر دکاندار کا کہنا تھا کہ نہیں اس میں نارمل مصالحے استعمال کیے جاتے ہیں
ایرن ہالینڈ نے فوٹو اینڈ ویڈیو شیئرنگ ایپ پر ویڈیو بھی شیئر کی اور نلی بریانی کے ذائقے کو انتہائی لذیذ قرار دیا۔
View this post on Instagram
ایرن ہالینڈ کو پاکستان میں گھومنا پسند ہے۔ انہوں نے اس سے قبل تاریخی شہر ملتان میں حضرت شاہ رکن عالم کے مزار پر حاضری دی تھی اور اپنی کچھ تصاویر شیئر کی تھیں۔
واضح رہے کہ ایرن ہالینڈ ماڈلنگ بھی کر چکی ہیں۔ وہ 2013 میں مس ورلڈ آسٹریلیا کا ٹائٹل اپنے نام کرچکی ہیں۔
ایرن نے پی ایس ایل سیزن 4، 5، 7، 8 اور 9 کے میچز بھی کور کیے ہیں۔ ان کا منفرد انداز پاکستانیوں کو خوب پسند ہے اور وہ وقتاً فوقتاً پاکستان سے اپنی محبت کا اظہار کرتی رہتی ہیں۔
