پاکستان پر بھارتی حملوں کے بعد پاکستان اسٹاک ایکسچینج کے بینچ مارک کے ایس سی 100 انڈیکس میں آج کاروبار کے آغاز میں 6,500 سے زائد پوائنٹس کی کمی کے بعد اپنے نقصانات کے اہم حصے کا ازالہ کرلیا۔
پاکستان اسٹاک ایکسچینج کے بینچ مارک کے ایس سی 100 انڈیکس 4000 پوائنٹس ریکور کر گیا، جو 1 لاکھ 7 ہزار کی نفسیاتی حد سے بڑھ کر 1 لاکھ 12 ہزار کی حد تک ٹریڈ ہوا، 100 انڈیکس اس وقت مجموعی طور پر 1800 پوائنٹس مائنس ہوکر 1 لاکھ 11 ہزار 7 سو پوائنٹس پر ٹریڈ ہو رہا ہے۔
کمرشل بینکوں، تیل اور گیس کی تلاش کرنے والی کمپنیوں، او ایم سی، پاور جنریشن اور ریفائنری سمیت کلیدی شعبوں میں فروخت کا دباؤ دیکھا گیا، انڈیکس ہیوی اسٹاکس بشمول او جی ڈی سی، پی پی ایل، پی او ایل، حبکو، ایس این جی پی ایل اور ایس ایس جی سی سرخ رنگ میں ٹریڈ ہوئے۔
یہ بھی پڑھیں: پاک بھارت کشیدگی: پاکستان اسٹاک ایکسچینج میں ٹریڈنگ شدید مندی کاشکار
میڈیا رپورٹس کے مطابق 4,500 پوائنٹس سے زائد تیز رفتار بحالی اسٹاک مارکیٹ کے بنیادی اعتماد کی عکاسی کرتی ہے، جو کہ مضبوط اقتصادی بنیادوں اور امریکی سیکریٹری آف اسٹیٹ کے تبصرے کے بعد کشیدگی میں تیزی سے کمی کے حوالے وابستہ توقعات کا غماز ہے۔
دیگر ماہرین کے نزدیک تازہ ترین بھارتی جارحیت اور بھرپور پاکستانی ردعمل کے بعد دونوں ممالک کے درمیان کوئی ’غیرمعمولی ہنگامہ‘ نہیں ہوگا اور بالآخر دھول جم جائے گی، دوسری جانب سرمایہ کار آئندہ آئی ایم ایف بورڈ اجلاس کے بارے میں پر امید نظر آتے ہیں، جس میں پاکستان کے لیے قرض کی قسط کا فیصلہ کیا جائے گا۔
پاکستان اور بھارت کے درمیان 2 دہائیوں سے زائد عرصے میں سب سے شدید جارحیت گزشتہ رات گئے اس وقت شروع ہوئی، جبکہ بھارت نے آزاد کشمیر میں سرحدوں پر گولہ باری سمیت پاکستان کے اندر اہداف کو نشانہ بنایا۔
مزید پڑھیں: پاکستان اسٹاک ایکسچینج میں کاروبار کا منفی دن
ڈی جی آئی ایس پی آر لیفٹیننٹ جنرل احمد شریف چوہدری نے بدھ کی صبح ایک پریس کانفرنس میں بتایا کہ بھارتی میزائل بہاولپور، کوٹلی اور مظفرآباد شہروں سمیت مقامات پر داغے گئے، جس میں کم از کم 28 پاکستانی شہید اور 46 زخمی ہوئے ہیں۔
پاکستان نے ان حملوں کا فوری اور بھرپور جواب دیا، پاکستانی فضائیہ نے بھرپور کارروائی کرتے ہوئے بھارت کے 5 جنگی طیارے مار گرائے اور ایک بھارتی بریگیڈ ہیڈکوارٹر مکمل طور پر تباہ کردیا ہے۔
