صدر تحریک انصاف چوہدری پرویز الٰہی نے کہا ہے کہ پی ڈی ایم والے آئین پاکستان سے کھلواڑ کررہے ہیں۔ اس ہفتے سپریم کورٹ سے بڑا فیصلہ سامنے آئے گا۔ اس وقت صرف اعلٰی عدلیہ نے ملک کو سنبھالا ہوا ہے۔ پورا ملک چیف جسٹس آف پاکستان کے ساتھ کھڑا ہے۔
لاہور میں پریس کانفرنس کرتے ہوئے سابق وزیراعلیٰ پنجاب چوہدری پرویز الٰہی نے کہا کہ اصل میں یہ عدلیہ کیخلاف سازش تیار کی جارہی ہے۔ ’خواجہ آصف خود نہیں بولتا اس کے اندر نوازشریف بولتا ہے۔ کالا کوٹ نیا انقلاب لے کر آئے گا اور انہیں بہا کرلے جائے گا۔ امید ہے اسی ہفتے سپریم کورٹ سے کچھ شارٹ آرڈر آئیں گے۔‘
پرویز الہی نے کہا کہ پی ڈی ایم حکومت نے اسلام آباد کے سوا پورے ملک کو جیل بنا کر رکھا ہے۔ عدلیہ کو سلام پیش کرتا ہوں عدلیہ کا وقار بلند ہے ،عدلیہ اس نظام کو بچا رہی ہے، پورا ملک چیف جسٹس آف پاکستان کے ساتھ کھڑا ہے۔
’میرے گھر پر حملے کے دوران پیسے اور موبائل فون بھی لے گئے ،مجھے پر17 جھوٹے مقدمات بنائے گئے ہیں۔ گھر پر حملہ کرنے والوں کو کبھی معاف نہیں کروں گا۔‘
چوہدری پرویز الٰہی کاکہناتھا کہ نگران پنجاب حکومت کی مدت ختم ہوچکی ہے۔ مدت ختم ہونے کے بعد بھی یہ حکومت کررہے ہیں۔ ’پی ڈی ایم نے آئین پاکستان کے کھلواڑ کیا۔ دوچار بندے کہتے ہیں ہم آئین ہیں۔ صدر سپریم کورٹ عابد زبیری کے خلاف بھی پی ڈی ایم کام کررہی ہے۔‘
سابق وزیر اعلی پنجاب نے کہا کہ بلاول کے دورہ بھارت کے دوران پاکستان کا جھنڈا ہی کہیں نظر نہیں آیا۔ بھارتی وزیر خارجہ نے بلاول سے ہاتھ تک نہیں ملایا۔
