سپریم کورٹ کے 2 سینیئر ججز کے استعفے کے بعد لاہور ہائی کورٹ کے جج جسٹس شمس محمود مرزا نے بھی عہدے سے استعفیٰ دے دیا ہے۔
میڈیا رپورٹس کے مطابق، 27ویں آئینی ترمیم کے بعد لاہور ہائی کورٹ کے جسٹس شمس محمود مرزا نے احتجاجاً استعفیٰ پیش کیا۔ جسٹس شمس محمود مرزا نے اپنا استعفیٰ صدر مملکت کو بھجوا دیا اور اپنے چیمبر کو خالی کر دیا۔
یہ بھی پڑھیے: سپریم کورٹ کے جسٹس منصور علی شاہ اور جسٹس اطہر من اللہ مستعفی
رپورٹس کے مطابق، جسٹس شمس محمود مرزا کا 27ویں آئینی ترمیم کے بعد تبادلے کا امکان تھا۔ وہ لاہور ہائی کورٹ کی انتظامی کمیٹی کے بھی رکن تھے۔
جسٹس شمس محمود مرزا نے 22 مارچ 2014 کو لاہور ہائی کورٹ میں بطور ایڈیشنل جج حلف اٹھایا تھا اور ان کی ریٹائرمنٹ 2028 میں متوقع تھی۔
واضح رہے کہ جنوری میں ان کے خلاف سرکاری وکیل کی جانب سے سپریم جوڈیشل کونسل میں ریفرنس بھی دائر کیا گیا تھا۔ جسٹس شمس محمود مرزا، سپریم کورٹ کے سابق جج جسٹس ضیا محمود مرزا کے صاحبزادے ہیں۔
