آندرے رسل نے بین الاقوامی کرکٹ سے ریٹائرمنٹ کا فیصلہ کرلیا

ویسٹ انڈیز کے اسٹار آل راؤنڈر آندرے رسل نے بین الاقوامی کرکٹ سے ریٹائرمنٹ کا اعلان کردیا ہے۔

کرک انفو کے مطابق ویسٹ انڈیز کے 37 سالہ آل راؤنڈر اینڈرے رسل آسٹریلیا کے خلاف پانچ میچز کی ٹی20 سیریز کے ابتدائی 2 میچز میں شرکت کے بعد بین الاقوامی کرکٹ کو الوداع کہیں گے، جو جمیکا کے سبائنا پارک میں ان کے ہوم گراؤنڈ پر ہوں گے۔

یہ بھی پڑھیں:ویسٹ انڈیز 27 پر آل آؤٹ: مچل اسٹارک نے 15 گیندوں میں 5 وکٹیں لے کر نیا عالمی ریکارڈ قائم کردیا

آندرے رسل 2019 سے صرف ٹی20 انٹرنیشنل کھیل رہے ہیں اور اب تک 84 میچز میں ویسٹ انڈیز کی نمائندگی کرچکے ہیں۔ ان کی ریٹائرمنٹ 2026 میں بھارت اور سری لنکا میں ہونے والے اگلے ٹی20 ورلڈ کپ سے 7 ماہ قبل ہو رہی ہے، وہ نکولس پورن کے بعد گزشتہ 2 ماہ میں ریٹائرمنٹ لینے والے دوسرے معروف ویسٹ انڈین کرکٹر ہوں گے۔

آسٹریلیا کے خلاف ٹی20 سیریز میں ویسٹ انڈیز کا اسکواڈ

آسٹریلیا کے خلاف ٹی20 سیریز میں ویسٹ انڈیز کے اسکواڈ میں شائے ہوپ (کپتان)، جیول اینڈریو، جیڈیہ بلیڈز، روسٹن چیز، میتھیو فورڈ، شمرون ہٹمائر، جیسن ہولڈر، عقیل حسین، الزاری جوزف، برینڈن کنگ، ایون لیوس، گڈاکیش موتی، روومن پاول، آندرے رسل، شیرفین ردرفورڈ اور روماریو شیفرڈ شامل ہیں۔

یہ بھی پڑھیں: آسٹریلیا کے ہاتھوں عبرتناک شکست، ویسٹ انڈیز کرکٹ بورڈ کا ہنگامی اجلاس طلب

کرکٹ آسٹریلیا کے مطابق ویسٹ انڈیز اور آسٹریلیا کے درمیان پہلا ٹی20 میچ 20 جولائی، دوسرا 22 جولائی، تیسرا 25 جولائی کو کھیلا جائے گا، دونوں ٹیموں کے مابین چوتھا ٹی 20 26 جولائی اور 5واں 28 جولائی کو کھیلا جائے گا۔