پاکستان نے عالمی برادری سے مطالبہ کیا ہے کہ کالعدم بلوچ لبریشن آرمی (بی ایل اے) کی ذیلی تنظیم ’مجید بریگیڈ‘ کو دہشتگردوں کی عالمی فہرست میں شامل کیا جائے۔
ترجمان دفترخارجہ نے ہفتہ وار پریس بریفنگ کے دوران ایبےگیٹ حملے کے ماسٹر مائنڈ شریف اللہ کی گرفتاری کو انسداد دہشتگردی کی جنگ میں پاکستان کی بڑی کامیابی قرار دیا۔ ان کا کہنا تھا کہ پاکستان فرنٹ لائن ریاست کے طور پر عالمی امن کے لیے بھرپور کردار ادا کر رہا ہے۔
یہ بھی پڑھیں: ٹی ٹی پی، مجید بریگیڈ اور داعش کے خطرے کا نوٹس لیا جائے، پاکسانی مندوب کا سلامتی کونسل میں خطاب
ترجمان نے حالیہ پہلگام واقعے پر بات کرتے ہوئے کہا کہ اس واقعے کی تحقیقات تاحال مکمل نہیں ہوئیں اور یہ ایک عالمی سطح پر تسلیم شدہ متنازع خطے میں پیش آیا۔ ان کا کہنا تھا کہ بھارت کی جانب سے اس واقعے کو ’لشکر طیبہ‘ جیسے کالعدم گروہ سے جوڑنے کی کوشش زمینی حقائق سے مطابقت نہیں رکھتی۔
انہوں نے الزام عائد کیا کہ بھارت ایسے واقعات کو پاکستان مخالف پروپیگنڈے کے لیے استعمال کرتا ہے تاکہ مقبوضہ کشمیر میں جاری انسانی حقوق کی خلاف ورزیوں سے عالمی توجہ ہٹائی جا سکے۔
یہ بھی پڑھیں: کالعدم بلوچ لبریشن آرمی کے پے در پے خود کش حملے، مجید بریگیڈ کیسے وجود میں آئی؟
دفترخارجہ کے ترجمان نے مزید کہا کہ پاکستان نے اپنی سرزمین پر کالعدم تنظیموں کے خلاف مؤثر کارروائی کی ہے، قیادت کو گرفتار کیا اور ان پر قانونی چارہ جوئی کی گئی۔ ترجمان نے عالمی برادری پر زور دیا کہ دہشتگردی کے خلاف غیرجانبدار اور اجتماعی کوششیں کی جائیں اور ’مجید بریگیڈ‘ جیسے عناصر کو بھی عالمی سطح پر دہشتگرد قرار دیا جائے۔
